KUCHING: Beteda kira empat hari da agi, Dara Kenyalang, sebengkah program realiti televisyen ngena jaku Iban keterubah deka dikeluar terus ba TVS, channel 122.
Pengeluar program begulai, Harry Frederick Diglin madahka Dara Kenyalang deka betemu enggau bala peminat berengkah 12 Februari 2023 ninting Hari Minggu, pukul 3 lemai.
Tandu program realiti mandangka pemajik sida ke indu nya mega ku iya ulih dipeda ninting Hari Dua ba jam ti sebaka enggau pukul 8.45 malam ninting Hari Lima.
“Ukai semina nyelinting pemajik gamal enggau pemanah laras tubuh aja tang penau, pengelandik, pemintar runding enggau pemai ulah diri empu ti meruan deka dipeda.
“Dara Kenyalang tu endang terubah suba ditibak ari penemu ti deka ngayanka penau dikembuan bala indu ti bisi ba Tanah Kenyalang ditu,” ku Harry ngelansa mimit batang tuju program realiti TV nya.
Produser Silver Halides Pictures nya madah, pengawa milih jaku Iban dikena ba program nya mega siti pengawa berani dikena nyaguka jaku bansa asal majoriti Sarawak ngagai tikas tinggi agi.
Iya enggau dua da pengeluar begulai program realiti TV nya, Mark Nyambang enggau Nazirwan Samsudin endang keran mai budaya asal dikemisi menua tu ngambi dipeda komuniti dunya luar.
“Gagit endar asai deka meda timbal ari bala mayuh laban program tu udah lama betangguh ketegal sekeda penekul sebedau tu lalu kami endang bisi pengandal ti besai.
“Ngarapka tuju enggau juluk ati kami tiga ti deka ngiga nama baru angkat pegari ba industri seni pemerindang ba Sarawak ditu diterima bala kita.
“Endang udah juluk ati dekaka program tauka pekit tu meri empas ngagai komuniti enggau menua ukai semina di Sarawak enggau Malaysia aja, tang ngilah remang, dikelala menua luar.
“Program realiti TV tu ila ukai semina ngambi nama tauka ngudahka pengawa aja.
Aku andal, program tu deka dikeingat enggau ditemu semua,” ku Harry mantaika pengandal diri.
Ke penerang, pengawa ngujika penau tauka audisyen program nya udah diatur ba selampur Sarawak berengkah ari Kuching ba selatan nyentuk Limbang adap utara.
Baka udah dipadah sebedau tu, program 13 episode nya bechuanka gaya atur pekit Kumang, Keligit enggau Dayung lalu dipegulai nyadi siti nyendiaka perais mata duit RM10,000 ungkup pemenggi gelar Dara Kenyalang.
Dara bajik ba penuduk lumur dua nerima RM7,000 seraya ketiga bulih RM5,000 lalu bala pemekit ba penuduk keempat ngagai keenam nerima perais sagu ati penyampau RM2,000 siku kelimpah perais berega bukai.
Ba episode keterubah ti dikeluar Hari Minggu tu deka mai kitai meda gaya atur pengawa bala indu ti datai ngujika penau diri rambau audisyen ti diatur ba Kuching enggau Serian.
Entara bala juri tauka akim ti dilempaika pengandal milih bala pemekit lebuh nya endang orang ti tebangkar nama dalam industri seni menua kitai baka Angela Martin, Wendy Earnest, Joanne Bulan Pakar enggau Priscilla Hyginus.
