KUCHING: Pengawa Datuk Zainal Abidin ngambi bagi ba Festival Muzik Kampung Ujan Sedunya (RWMF) 2024 ukai semina ketegal deka merindang tang deka meri penyedar ngagai mensia mayuh pasal isu rampa menua dunya.

Rambau dirandau begulai enggau media, iya madahka diri berasai temegah laban festival nya chakah ngatur pemeruan rampa menua.

“Tuju aku ngambi bagi ba festival tu ukai semina deka merindang tang aku angkun deka meri penyedar pasal isu rampa menua global,” ku iya.

Zainal mansutka jaku nya rambau aum pemberita ba Damai Beach Resort ditu, sehari tu.

Iya ti merindang ba malam kedua ngena muzik nyadi pelasar ngenataika pesan pasal mensia enggau rampa menua.

“Nengah inisiatif tu, aku ngarap ulih meri inspirasyen ngagai mensia mayuh bekaul gaya enggau empas positif ngagai bala pengusung.

“Aku ngena muzik tu nyadi pelasar ngaul mensia mayuh ngambi begulai nambah penyedar pasal rampa menua,” ku iya.

Zainal madahka iya deka merindang naka pemanah ngambi bala pengusung berasai ditegu sereta ulih berunding kritis pasal pengawa nyaga rampa menua.