KUANTAN: Perintah Pahang ngemendarka atur tekala nya orang tuai enggau anak mit tama ngagai kedai makai enggau terus makai dia.
Ku iya, atur nya ulih dikena ba medan selera, palan bedaja, kedai ba tisi jalai, trak pemakai ba selampur nengeri enggau mega palan ngetu (R&R).
Menteri Besai Datuk Seri Wan Rosdy Wan Ismail madah, pemendar nya dikenatai pengudah beratika utai ke nyadi enggau peminta diatu kelimpah beratika sekeda operasyen dagang nya di baruh Atur Tagang Pejalai Penyuman (PKPP).
“Perengkaguna ba palan R&R baka surau enggau agu mega dikemendar dibuka.
“Taja pia, palan mensia mayuh enggau palan bemain agi ditagang dilawa mensia mayuh,” ku iya nerang, ditu kemari.
Berebak enggau nya, iya ngelalau mensia mayuh nitihka Standard Atur Pengawa (SOP) ti ditetapka perintah nyengkaum nyakah takah lebuh diau ba endur nya.
Nambahka nya, Wan Rosdy madahka Perintah Pahang mega netapka nadai tatak penguna ti dikemendar duduk ba mija ungkup tiap kedai makai.
“Aku inta SOP ti udah ditetapka sebedau tub aka nyaga takah semeter entara penguna enggau pengereja semampai dititih,” tandu iya.
