Diatu maya malas undi rayat, ku Ali

SARATOK: Semua kaban PKR Saratok diperansang ngambika chakah agi ngatur program meri penerang bekaul enggau polisi sereta langgur Perintah Besai Pakatan Harapan (PH) ngagai mensia mayuh lebih agi ba pelilih menua tu.

Chairman PKR Saratok Ali Biju mansut penemu tu lebuh bejadi Aum Ninting Taun PKR Saratok, apin lama ke udah.

“Kitai (PKR Saratok) patut chakah agi ngerembaika penerang ngagai mensia mayuh

“Penerang ti engkeman pasal polisi enggau langgur Perintah Besai patut dikerembai laban peranak menua pesisir agi mayuh apin nemu langgur pemansang ti deka diatur Perintah Besai,”ku iya.

Berebak enggau nya, iya ke mega Chairman Komiti Polisi Rumah panjai Menua madah laban udah nyadi Perintah Besai nya alai chara ngereja tanggungpengawa nitih chara perintah ngatur pemansang awakka rayat bulih penguntung lalu ulih ngasaika pemaik langgur ti diperambu Putrajaya.

ALI BIJU

“Kitai meseti ngaul rayat enggau rat agi ari ke udah. Anang bechiping maya magi agih pemansang ngagai rayat.

“Tu meh tuju kitai minta pilih rayat maya bepilih suba. Diatu meh maya kitai mayar undi rayat enggau pemansang nadai ngira parti politik diari sida iya,”ku iya.

Aum Ninting Taun(AGM) Parti PKR 2019 diatur ba Opis Parti nya lalu digulu sepenyampau 300 raban parti ti udah direjista Pelilih Saratok.

Sama datai Chairman Mendam PKR Saratok Antok Jaya, Sapit Chairan PKR Saratok, William Barang Usop, Sekretari PKR Saratok Glenn Anthony enggau Ketuai Pating PKR Pelilih Kabong enggau Roban.

JENUH…Entara kaban PRK Saratok ke bisi ngulu Aum Ninting Taun PKR Saratok, apin lama ke udah.