MIRI: Siku lelaki dijil Kort Majistret pengelama lapan bulan ‘upah’ ngamang indai kandung iya ngena sebilah duku.
Majistret Leona Dominic Mojiliu ngerah ukum nya ngagai Yek Tek Siong, 33 taun pengudah ngaku salah lebuh penyalah iya dibacha.
Kort ngerah pesalah ti nadai kereja nya dijil bepun ari haribulan iya ditangkap, kena 24 June tu tadi.
Nitihka penyalah, iya didawa ngereja penyalah ngamang enggau niat seraya mantaika sebilah duku ketegal ringat enggau indai iya, Lu Su Ing, 74 taun ngujungka iya berasai takut.
Nitihka penerang kes, tetuduh ngereja penyalah nya ba sebuah rumah di Siang Siang Garden, Pujut 6 ditu utung pukul 7.11 malam, 24 June tu tadi.
Kes dipansik di baruh Seksyen 506 Kanun Keseksaan ketegal ngereja penyalah ngemba ke deka dijil maksimum tujuh taun tauka kena tunggu tauka kededua sekali enti ditemu salah.
Dulu ari nya, pemesai pedawa ASP Mary Ong minta iya diukum nitihka pematut lalu lelaki nya nadai diarika luyar ngapil ukum iya dikurangka agi.
