KUCHING: Siku penanyi Dayak, Benson Sem, mujur ngeluarka lagu pemadu baru iya ti pejuluk ‘Disindir Bala Nuan Belama’ kena 12 Julai tu tadi.
Lagu ayun lundai nya dirikod iya ba Bungai Terung Studio ti bepalan ba Bintulu lalu dikeluarka ba baruh perabung Tinting Nanas Channel.
Nangkan nya, penanyi veteran tu mega merambu ngerikod lagu ‘Ibu Mabuk Selalu’ ti deka dikeluarka enda lama agi.
Dulu agi ari nya, iya mujur ngeluarka dua iti lagu ba baruh perabung Jamison Music Production iya nya ‘Tuai Sebeledi’ enggau ‘Enda Disagi Bala Ku Nguai’.
Pia mega, nengah chanel YouTube iya empu ti diberi nama vensen888, penanyi asal Miri nya mujur ngeluarka tiga lagu diri baka ‘Empat Taun Udah Belalu’, ‘Tegenung’ enggau ‘Kereja Keluar Nengeri’.
Benson Sem madah, pengerindu ba pengawa belagu nya endang dikembuan iya ari mit lalu nya majak ngerembai ninting hari.
Ku iya, sebedau tepejuh ba dunya pemerindang Dayak, iya suah masuk bemacham pekit belagu kelebih agi ti diatur ba pelilih Miri enggau Bintulu.
“Keterubah nyadi artis Dayak suba, mayuh penguji ditapi aku tang nya enda madamka niat enggau minat besai aku ba pengawa tu.
“Enda masau peluang, dia aku berengkah nengkebang leka lagu ukai semina ungkup diri empu tang ungkup penanyi bukai.
“Seraya mulaika kenang, aku kala bekerejasama enggau serikat Lemambang Music Production kelimpah ngasilka siti album VCD ti ngundan 10 iti lagu ti dikeluarka ba baruh perabung Serikat Irama,” terang iya.
Lagu ‘Enda Ulih Ngambi Nuan Ke Bini’ mujur ngangkatka nama Benson Sem ba dunya pemerindang Dayak sereta dikelala mensia mayuh.
“Enti enda salah ingat aku, siti ari lagu aku ti pejuluk ‘Sulu Anang Nuan Irau’ kala masuk Charta Miri.FM ba taun 2015 suba,” ku Benson ti gawa ba sebuah serikat ba Miri.
