Diskaun bil ai sebagi inisiatif dibaruh BKSS

KUCHING: Pearintah Sarawak ransing mantu rayat Sarawak sekumbang timpuh pandemik Covid-19 nyengkaum meri diskaun bil ai ngagai semua penguna ba menua tu.

Menteri Utiliti Datuk Seri Dr. Stephen Rundi Utom madah, nya sebagi ari inisiatif dipejalai di baruh Pakej Bantu Khas Sarawakku Sayang (BKSS).

“Sebedau igi penyakit Covid-19 ngerekai, Perintah Sarawak mega udah bejalaika program ai pechuma ke alai sida nyendiaka ai pechuma ungkup RM5 dalam bil ai ninting bulan bepun 1 Januari tu tadi.

“Ai perchuma RM5 nya sama enggau urung 11,300 liter ai lalu nya mih sebagi ari inisiatif Perintah Sarawak ngelempung tating belanja rayat kelebih agi peranak menua pesisir ba Sarawak,” ku iya nerang, ditu kemari.

Ku iya, ungkus ai pechuma tu diungkupka Perintah Sarawak ngagai rayat ti beungkus urung RM40 juta setaun.

“Beduduk ari igi penyakit Covid-19 ngerekai menua tu, Perintah Sarawak ngepunka 16 inisiatif dikena ngelempung penusah rayat ari sukut belanja.

“Sebagi ari inisiatif tu iya nya meri diskaul bil ai pengelama enam bulan bepun 1 Januari ngagai 30 September tu,” terang Rundi.

Iya mega madah, di baruh inisiatif nya, ketuai bilik ke bisi akaun deka bulih diskaun 25 peratus, domestic/ komersial enggau penguna komersial nerima diskaun 15 peratus seraya penguna industri nerima diskaun 10 peratus.

“Diskaun bil ai ti disediaka Perintah Sarawak disadang ngena belanja RM25.26 juta enggau pulaika pemanah ngagai urung570,000 penguna ba selampur Sarawak.

“Diskaun rega nya sebagi ari BKKS ti dibantai Kepala Menteri Datuk Patinggi Abang Johari Tun Openg ba bulan March tu tadi dikena mantu rayat Sarawak ti ngasaika penusah ketegal pandemik Covid-19,” ku iya nyemetak madah.

Nambahka nya ku Rundi, sida deka terus bekerejasama   enggau semua ejensi bekal ai baka Opis Bekal Ai Menua Pesisir (JBALB) Sarawak, Kaunsil Ai Kuching (KWB), Kaunsil Ai Sibu (SWB) enggau LAKU Management Sdn.  Bhd.

“Perkara nya nentuka Sarawak enggau rayat ba menua tu nerima bekal ai 100 peratus ungkup inisiatif ti bekualiti manggai taun 2025,” tandu iya.

Suara Sarawak