KUCHING: Perintah Sarawak deka neruska diskaun bil karan ninting bulan nengah Bantu Khas Sarawakku Sayang (BKSS) berengkah bulan Julai 2023.

Menteri Utiliti enggau Telekomunikesyen, Datuk Julaihi Narawi madah, bantu nya deka meri pemaik ngagai urung 700,000 penguna di selampur Sarawak.

“Diskaun dipelaba beungkus RM123 juta ungkup penguna domestik enggau RM80.7 juta ungkup pedagang mit tu ditanggung penuh Perintah Sarawak.

“Penyampau semua diskaun ti ditampung berengkah 1 Julai nyentuk 31 Disember tu dipelaba manggai RM203.7 juta,” ku iya.

Julaihi bejaku munyi nya rambau aum pemberita BKSS di Begunan Kaunsil Pemansang enggau Pengintu Tanah (PELITA) ditu, tadi.

Ku iya, bantu nya deka meri diskaun nyentuk 25 peratus ngagai penguna domestik, 15 peratus pedagang mit komersial enggau 10 peratus pedagang mit industri.