KUCHING: Projek Sapat Bah Sungai Sinjan beungkus RM41.9 juta disadang tembu Oktober taun baru.
Projek nya tembu ila deka mutar timpuh panjai penanggul bah ba menua Kuching, kelebih agi Matang enggau ngelingi nya.
Berindik ari nya, siti pejalai ngabas projek udah diatur betuai ke Sapit Menteri Besai ti mega Menteri Idar Kuasa enggau Transformasyen Ai, Datuk Amar Fadillah Yusof ditu, kemari.
Nitih penerang, projek nya sebagi ari inisiatif Projek Pemansang Seradak Sungai Begulai (PLSB) Sungai Sarawak beungkus RM191 juta, ti mungkur tiga pakej dikena negapka sistem entali ai enggau mutar penanggul bah ba endur baruh.
Entara komponen besai projek nyengkaum ngaga pegung rangkai, sistem parit semin enggau struktur nyaga ai anyut ti digaga dikena nambah penyikar pengawa ngintu ai, kelebih agi maya ujan bangat.
Enti projek tembu ila, deka meri pemaik ngagai lebih 2,800 peranak sereta nyaga menua pemesai lebih 330 ikar ari ampuh, sereta nya ngangkatka tikas idup enggau pengelikun komuniti dia.
Ba pejalai nya, sida mega bisi ngabas taba projek nyengkaum rentayan sistem parit baru enggau kereja ngerawang sereta ensiang sungai ti nyadi komponen beguna nambahka kapasiti ai anyut.
Sama datai, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah) ti mega Kaban Kunsil Nengeri (ADUN) Samariang, Datuk Sharifah Hasidah Sayeed Aman Ghazali enggau Tuai Sekretari Politik Premier Sarawak ti mega ADUN Tupong, Datuk Fazzrudin Abdul Rahman. -EDISI UKAS
