KUCHING: Program Dwibahasa (DLP) Sarawak diatu dikerembai ke Pom Satu, pengudah mujur diatur ba semua renggat sekula primari.
Menteri Pelajar, Inovasyen enggau Pemansang Penau, Datuk Sri Roland Sagah Wee Inn madah, nya mega ngelai siti pemujur besai ba pengawa negapka ngajar enggau belajar ke Sains enggau Matematik ngena jaku English.
“Taun tu kelai taun ketujuh DLP Sarawak dipejalai. Pemadu beguna, taun 2026 tu, DLP Sarawak udah dipejalai ba semua renggat sekula primari lalu diatu dikerembai ke Pom Satu.
“Taja perati suah diberi ngagai pengajar Sains enggau Matematik, tang kitai mega patut ngaku pemujur DLP Sarawak berengkah enggau pengawa ngajar jaku English ti nemban.
“Pengajar jaku English ngesan pangku pengawa besai ngaduka tiang pemun ti ngasuh nembiak ulih mereti ke konsep, akses utai kena belajar enggau komunikasyen ti ngasuh sida bisi pengandal ngena jaku English,” ku iya.
Sagah nyebut jaku nya ba mua mayuh rambau bejadi Simposium Pelajar Jaku English Sarawak Ke-10 (SELES) 2026 ditu, kemari.
Sama datai, Sapit Menteri Pelajar, Inovasyen enggau Pemansang Penau, Datuk Dr Annuar Rapaee enggau Sapit Direktor Sektor Pengatur Sekula (SPS), Les Met.
Iya nyemetak madah, pengawa nguasa jaku English tetap nyadi penyungkak dikena ngamatka juluk Sarawak nyingkang nyadi siti ekonomi bepenatai pemisi tinggi ti disungkak inovasyen.
“Semua tu begunaka pengereja ti ukai semina sikar ari sukut teknikal aja, tang ulih bekomunikasyen enggau bisi pengandal bekerejasama ba rengat global.
“Kitai ngeleda mayuh pengajar gawa napi pemar, kelebih agi ba menua pesisir enggau menua ulu.
“Tang ari semua pemar tu, kita (pengajar) tetap ransing ati gawa, profesionalisme enggau pengepuh nentuka tetiap anak bulih akses ngagai pelajar ti bisi kualiti,” ku iya.
Nya alai, Sagah madah, SELES 2026 udah sepuluh kali diatur, ke alai semua raban ngaul diri patut majak besaup ngenegapka pelajar jaku English, nyukung DLP Sarawak sereta ngerandang mayuh agi peluang ngagai bala nembiak.
“Reti kebendar SELES ukai semina bepanggai ba utai ti nyadi sekumbang simposium tu aja, tang mega baka ni penemu ti diulih nya ulih dikerembai enggau dikena nyadi peneleba ngajar enggau belajar ti meruan agi ngagai bala nembiak ba selampur Sarawak.
“Pemadu beguna, enti kita udah pulai ke sekula diri empu, anang nyimpan penemu enggau pengelandik ti diulih sekumbang simposium tu dikena diri empu aja.
‘”Kunsi penemu enggau bakih sama gawa, atur pengawa bekunsi penemu profesional, embing bala pengajar biak lalu mantu nempa budaya belajar belama ba sekula kita,” terang iya. NICK FLETCHER
