SRI AMAN: Premier Sarawak, Datuk Patinggi Tan Sri Abang Johari Tun Openg deka dokumen asal Sempekat Bebaik 1973 digiga enggau disimpan ba Galeri Rumah Sri Aman.
Ku iya, dokumen nya beguna laban nyadi pun sejarah bebaik di Sarawak pengudah Parti Rakyat Kalimantan Utara (PARAKU) nyerah diri alah.
“Kitai udah bisi Sri Aman Peace Park, Rumah Residen enggau Galeri Rumah Sri Aman ti nyadi muzium.
“Aku udah minta Karim (Menteri Nembiak, Lumba Enggau Main Sereta Pemansang Orang Dagang, Datuk Seri Abdul Karim Rahman Hamzah) ngiga dokumen asal pengawa nya ba arkib.
“Aku mega udah minta Sekretari Perintah (SS) ngiga dokumen tu, enda nemu sapa nyimpan dokumen nya,” ku iya.
Abang Johari bejaku munyi nya rambau program nutup Pengerami Benak Sri Aman Edisyen Ke-20 2023 ba Tebing Waterfront Sri Aman ditu, tadi.
