INDUN SILONG
Suarasarawak.news@gmail.com
KUCHING: Bup Pejuang Sejati: Dari Rimba Ke Astana enggau 365 Hari di Astana: Cherita enggau Gambar TYT Tun Pehin Sri Dr Haji Wan Junaidi Tuanku Jaafar ngelai komitmen ti tegap sereta betampung siku tuai ngagai komuniti.
Premier Sarawak, Datuk Patinggi Tan Sri Abang Johari Tun Openg madah, bup 365 Hari di Astana meri basa ngagai tuai ti ulih meri inspirasyen enggau ngempung mensia mayuh.
“Nengah bup tu, aku ngembuan juluk ati ngagai bala pemacha ulih beratika pekara senentang pengawa enggau penyulut ti konsisten ngetan penegap enggau penyulut Sarawak,” ku iya.
Abang Johari bejaku munyi nya rambau pengerami ngelanchar dua bup nya di Balai Santapan, Kunsil Nengeri (DUN) Sarawak ditu, malam tadi.
Iya mega ngarap pengawa ngeluar bup nya ulih ngerandang jalai, meri inspirasyen enggau ngepun penemu ngagai pengawa nyelak mayuh agi bup di Sarawak.
Kebuah pia, ku iya, laban rikod baka nya deka nyadi reta tengkira nengeri ti berega lalu enda tau enda diintu ngambi nyadi chuan ungkup rebak diatu sereta dudi hari.
Abang Johari meri tabi basa enggau terima kasih ti besai ngagai semua orang ti udah mantu ba pengawa ngeluar bup nya kelebih agi bala tukang gambar, pemansik enggau tim editorial ti udah bebendar gawa nentu genap lambar bup nya ngayan batang pengawa TYT.
