Dua iku dalam kerita dikemendar

KUCHING: Perintah Sarawak besetuju deka nitihka atur nasional ti ngemendarka dua iku diri sebilik bejalai dalam sebuah kerita.

Sapit Kepala Menteri ti mega nyadi Chairman Komiti Penyangga Penusah Ngenyit Nengeri (JPBN) Datuk Amar Douglas Uggah madahka Sarawak ngemendarka pekara nya berengkah kemari.

Menteri Kanan (Kluster Pengelikun) Datuk Seri Ismail Sabri mantaika atur nya ba aum pemberita di Putrajaya, lemai ensanus.

Ku iya, pekara nya digaga pengudah nerima timbal ari mensia mayuh.

Berebak enggau nya, ba aum pemberita di Summer Mall, Kota Samarahan ensanu, Uggah mega dirandau pemberita bekaul pekara ke sama.

Taja pia ku iya, iya bedau nerima sebarang penerang rasmi ari Kuala Lumpur bekaul enggau pekara nya.

“Kami chukup bejaga lebuh ngaga pemutus ti baka tu laban tu ulih meri bekau ngagai nengeri kitai,” ku iya.
Ku iya ba siti penerang kemari, Sarawak deka nitihka atur nasional bekaul enggau pekara nya.

“Kami diatu ngemendarka dua iku diri sebilik bejalai ngena siti kerita enti sema deka bebelika barang pemakai, ubat, perengkaguna ninting hari, ubat diet tauka sebarang servis ke diguna nyengkaum servis berubat.

“Lalu nitihka atur nasional nya enda tau lebih ari dua iku dalam siti kerita,” ku iya.
Rambau Atur Tagang Pejalai Fasa Ketiga, Perintah Sarawak ngemendarka dua iku bejalai ngena siti kerita tauka motosikal ba menua pesisir.

Tang nya semina diungkupka ngagai bala ke bekebun kelebih agi sida ke bumai, besawit tauka bekebun getah.

Suara Sarawak