Dua kes pemati ngaul orang tuai

KUCHING: Dua kes pemati enggau 587 kes baru positif Covid-19 dirikodka ba Sarawak sehari tu.

Komiti Penyangga Penusah Nengeri (JPBN) dalam siti penerang media madah, nya ngujungka penyampau kes pemati enggau kes positif ketegal Covid-19 di menua tu nambah 182 iku enggau 31,691 kes.

Kes pemati sehari tu ngaul dua iku indu ke beumur 82 enggau 88 taun ti diperubat ba Sepital Mukah enggau Sepital Sibu.

Siku ditemu enda ngeleda kena 25 April lalu ditukuka midang ba hari ti sama, ke alai siku agi bisi sendat seput sereta mutah sebedau ditukuka midang kena 1 Mei.

Taja pia, seduai sama bisi penyakit bukai iya nya darah tinggi, kemi manis enggau penyakit jantung.

Ku penerang nya, 67 peratus kes baru positif Covid-19 kemari dirikod ba Pelilih Menua Mukah, Bintulu, Sibu, Kanowit enggau Kuching.

Pelilih menua ti ngerikodka kes baru positif Covid-19 tu, iya nya Pelilih Menua Mukah (175), Bintulu (61), Sibu (57), Kanowit (56), Kuching (45), Kapit (37), Miri (30), Sri Aman (25), Sebauh (20), Song (14), Pakan (9), Serian (8), Meradong (7), Subis (7), Bau (6), Betong (5), Beluru (5), Tebedu (4), Lundu (4), Tanjung Manis (3), Matu (2), Samarahan (2), Tatau (1), Marudi (1), Julau (1), Dalat (1) enggau Simunjan (1).

Suara Sarawak