Dua lelaki bejual rengka jelu ba Makit Teresang diukum

SIBU: Dua lelaki peranak menua tu ti ngembuan mayuh bansa rengka jelu dijaga udah nerima ukum ari Kort Sesyen Hari Satu tu tadi.

Entara utai dikembuan seduai iya nya bulu burung ruai, keruntuk jugam enggau tanduk rusa.

Akim Kort Sesyen, Stella Augustine Druce ngeleka ukum nya pengudah Uweng Ding, 51 taun, enggau Robin Njuk, 40 taun, ngaku diri salah.

Uweng didawa ngembuan rengka bansa jelu dijaga iya nya 47 lambar bulu burung ruai ngujungka iya ditimbang RM6,000 tauka jil enam bulan.

Robin napi tiga tuduh iya nya ngembuan 22 lambar bulu burung ruai, siti keruntuk pala jugam enggau tujuh tanduk rusa Sambar sereta tiga tanduk kijang, ditimbang RM13,000 tauka jil 17 bulan.

Seduai nya didawa ngereja penyalah rambau operasyen dipejalaika Sarawak Forestry Corporation (SFC) enggau Komiti Besai Nagang Penyalah Makai Suap Malaysia (SPRM) kena 5 Oktober, 2019, ba Makit Teresang Kapit.

Dawa nya digaga Sapit Pendawa Raya Khairul Kabir Abdul Kadir enggau Hisyamudin Roslan.

Burung ruai entara bansa burung dijaga seraya keruntuk jugam enggau tanduk rusa ari bansa jelu dijaga di baruh Seksyen 37, Ordinan Pelindungan Hidupan Liar 1998.

Sebarang piak ti ngasu, nyual, import, eksport tauka ngembuan jelu dijaga tauka rengka jelu nya tau dijil nyentuk dua taun tauka timbang RM25,000.