KUCHING: Dua iku lelaki peranak menua tu mujur ditangkap dipelaba bisi kaul bejual dadah pengudah 32.73 kilogram pil Erimin 5 ti berega RM3.3 juta dirampas di Padang Bilun Antarabansa Kuching (LTAK), kena 28 September tu tadi.

Pemangku Kepala Polis Sarawak, DCP Saifullizan Ishak madah, kededa suspek ti beumur 25 engkau 39 taun nya ditangkap ba balai datai padang bilun nya lebuh datai ari Senai, Johor.

Iya madah munyi nya ba aum pengarang berita ba Indu Opis Polis Kontinjen (IPK) Sarawak ditu, kemari.

Ku Saifullizan, asil pansik tetemuka kededa suspek ngaku pengawa nya udah dikereja kedua kali, seraya transaksyen keterubah lepas ari peresa lalu nadai ditemu raban ti bekuasa.

“Ungkup tetiap transaksyen, dua iku lelaki nya dipelabaka nerima bayar RM5,000 siku.

“Orang ke ngupah sida ngereja pengawa nya udah dikelala lalu diatu benung dipansik ungkup mantu pansik,” ku iya.

Saifullizan madah baru, sindiket nya dipelabaka bulih bekal dadah ari Johor Bahru sebedau dibai ke Kuching ngena bilun ngambika dijual ba menua tu.

Kededa suspek nya asal ari Miri, ke alai siku nya gawa berikan seraya siku da nadai batang pengawa.

Peresa ai kemi tetemuka suspek ke beumur 25 taun nya positif dadah bansa methamphetamine, amphetamine engkau benzo, lalu suspek ke beumur 39 taun nya negatif dadah.

Pengawa meresa rikod penyalah tetemuka suspek ke beumur 25 taun nya bisi tiga rikod sebedau tu nyengkaum siti penyalah dadah engkau dua penyalah bukai, lalu ke siku da bisi dua rikod penyalah.

Kededua suspek didawa nengah Seksyen 39B Akta Dadah Berbahaya 1952 di Kort Majistret Kuching kena 7 Oktober tu tadi.

Enti ditemu salah, seduai tau diukum mati tauka dijil seumur idup. Enti enda diukum mati, deka dilinsun enda kurang ari 12 kali.

Ku Saifullizan, pemujur nya mandangka Opis Pemansik Penyahal Narkotik (JSJN) Sarawak seruran ransing ngelaban pengawa bejualka dadah engkau nyekat rentayan sindiket di nengeri tu.

Mensia mayuh ti bisi penerang bekaul engkau aktiviti dadah tau telefon ngagai JSJN ba lumur 012-208 7222.