MATU, Daro: Dua menyanak bebadi nyawa ba sebengkah penusah angus ngaul dua buah rumah di Kampung Sekaan Kecil, tumu pagi tadi.
Niang Sedeh Sahari, 84 taun, enggau Remlah Mesie, 54 taun, enda telarika diri lalu tepekul lebuh api benung mau makai rumah nya urung pukul 2 dini hari.
Siku agi sida ke tasah benama Abdul Razak Mesie, 40 taun, selamat pengudah ulih pansut ari rumah sereta ngelarika diri.
Komander Operasyen Opis Bomba enggau Penyah Penusah Daro, Mustapa Wasli madah, penusah nyadi lebuh semua sida nya benung jenak tinduk.
“Bomba berumban ngesah ngagai endur penusah nyadi pengudah nerima kangau ngenyit urung pukul 2.09 dini hari.
“Kami dipadah, anak niang ke mega nyelai pendiau (OKU) ulih pansut ari rumah nya tang iya nikal baru laban deka nyelamatka indai iya ngujungka seduai bela tepekul sebedau bebadi nyawa.
“Menyadi niang ti selamat madahka diri sendat seput udah nya ditaban ngagai Sepital Daro ngambika diperubat,” terang iya.
“Tang lebuh datai dia, rumah sida endang udah angus lengis,” ku iya lebuh dirandau.
Ku iya, lebuh penusah nya semua sida dani ngenyit lebuh ninga munyi utai inggar sereta ngasaika pengangat daing api.
