TANJUNG MANIS: Pejalai projek Jalai Pasi-Tanjung Manis enggau Jematan Batang Rajang diperambu tembu penuh September 2024.
Premier Sarawak, Datuk Patinggi Tan Sri Abang Johari Tun Openg madah, projek ti nyambung Tanjung Manis nengah Sarikei ngagai Sibu nya deka meri pemaik ngagai rayat.
“Nya kebuah, ari Sibu ngagai Sarikei begunaka timpuh urung 40 minit enggau mensia mayuh ulih nengah jematan baru ke benung digaga lalu tembu September 2024 nya ari Sarikei ngagai Tanjung Manis.
“Pengudah tembu ila, timpuh pejalai entara Sibu enggau Tanjung Manis semina begunaka timpuh urung sejam aja,” terang iya.
Abang Johari mansutka jaku nya lebuh bejadi Pengawa Nutup Safari Nginti Tanjung Manis 2023 ti diatur serimbai Pengerami Jubli Emas Kaunsil Pemansang Industri Kayu Ramu Sarawak (STIDC) di Tanjung Manis, ditu tadi.
Abang Johari mega madah, timpuh pejalai ari Sibu ngagai Kuching deka pandak agi nengah pemansang rentayan jalai alun ba tebing pantai.
