BINTANGOR: Peranak ba Rumah Rentap enggau Rumah Jalang deka ngasai pengelantang ari bekal ai ti beresi sereta meruan nengah projek nyambung paip baru ti deka nambah kualiti pengidup sida.
Kaban Kunsil Nengeri (ADUN) Meradong, Datuk Ding Kuong Hiing madah, projek nya kelai pengeran perintah nyendia perengkaguna pemun ngagai komuniti menua pesisir ngambi sida ulih ngasai fasiliti seikas endur bukai.
“Projek beungkus RM140,000 tu nyengkaum ngelekat batang paip pemesai 150 milimeter sepanjai urung 650 meter lalu disadang meri pemaik ngagai 35 pintu rumah ba kededua rumah panjai nya,” ku iya.
Kuong Hiing madah munyi nya lebuh ngabas taba Projek Bekal Ai Baru di Rumah Rentap enggau Rumah Jalang, ditu kemari. Ku iya, pengawa nyendia sistem bekal ai ti menyana agi ukai semina ulih nangkup peminta peranak ninting hari, tang mega nambah tikas idup komuniti menua pesisir.
Berebak enggau nya, iya minta semua peranak meri kerejasama sekumbang projek nya dipejalai nentuka semua pengawa ulih tembu nitih taga lalu nadai napi sebarang penanggul ti ulih ngeruga pemaik ngagai komuniti.
Ku iya, peranak patut ngenang inisiatif perintah ti udah ngemendar agih belanja nentuka pengawa nyendia bekal ai dipejalai ba kededua rumah panjai nya.
“Aku mega deka ngingatka sebarang bida penemu tauka penguntung siku-siku orang ukai nyadi kedalih nekul projek
ti meri pemaik begulai ngagai semua komuniti.
“Ukai nyamai ngulihka pemendar agih belanja perintah nengah Opis Bekal Ai Menua Pesisir (JBALB) Sarawak, nya kebuah peluang tu meseti dikena manah ke pengelantang rayat,” terang iya.
Iya ngarap ke projek nya ulih tembu nitih perambu lalu negap pemansang infrastruktur pemun dia sereta nyamin bekal ai ti entap agi ngagai peranak dudi hari.
Ba penemuai nya, siti randau begulai enggau peranak mega diatur dikena ngulihka timbal bekaul pejalai projek.
Sama datai, Pegawai Pelilih Meradong, Wee Teck Min; Penguasa Tanah enggau Survei Bagi Menua Sarikei, Awan Amal, Penulung Pegawai Opis Bekal Ai Menua Pesisir (JBALB) Bagi Menua Sarikei, Ling Kah Wei; Pemancha Yii Hee Sieng sereta Penghulu Selah Jugi.
