Dua staf perintah rugi bepuluh ribu ‘sintak panjuk’ pengerindu

KUCHING: Dua iku indu kena tipu dua iku lelaki peranak menua luar dalam Parcel Scam ti dikelala seduai nengah media rama.

Ketuai Opis Pansik Penyalah Komersil Sarawak, Superintendan Maria Rasid madahka kes keterubah ngaul siku indu beumur 33 taun ke mega orang gawa perintah ba sebuah opis perintah di Simunjan rugi lebih RM3,000.

Ku iya, indu nya bekelala enggau siku lelaki benama Reyyan Jackson kena 26 Februari tu tadi lalu madahka diri asal ari United Kingdom pengudah dua minggu bekelala.

“Reyyan Jackson madahka bisi nganjung barang ngagai indu nya lalu bungkus nya ngundan barang emas, komputer, iPhone engau mata duit USD kena 3 March tu tadi.

“Udah nya, Reyyan ngasuh indu nya mara chukai Opis Kastam penyampau RM3,000.

“Indu nya ngaga dua transaksyen mindahka duit penyampau RM3,550 nengah online ngagai siti akaun bank atas nama orang ti enda dikelala kena 5 enggau 6 March baka ti diasuh saspek,” ku iya nerang, ditu ensanus.

Maria madahka indu nya sedarka diri kena tipu pengudah laki nya ngasuh iya nambahka bayar penyampau RM10,000 tang barang dikirum lalu nadai datai,” ku iya.

Nambahka nya ku Maria, kes kedua nya ngaul siku nembiak Palan Pelajar Tinggi Peribit (IPTS) di Kuching beumur 27 taun rugi lebih RM3,000 pengudah ditipu siku lelaki peranak menua United Kingdom benama Joseph Foster Smith ti dikelala nengah Instagram kena 5 March tu tadi.

Ku iya, saspek madahka diri deka meri tepa ngundan barang berega baka beg sandik, duit 20,000 GBP, telefon pintar, minyak angi, komputer enggau jam ngagai indu nya kelai seduai bebakih.

“Udah nya, saspek ngasuh iya mayar penyampau RM3,5000 dikena mayar chukai kastam ba Padang Bilun Entarabansa Kuala Lumpur (KLIA) laban tungkus nya ngundan mata duit Pound Sterling.

“Indu nya udah ngaga dua transaksyen penyampau RM3,500 nengah mesin ATM ba sebuah bank di Kuching ngagai siti akaun bank atas nama orang ti enda dikelala kena 16 enggau 18 March tu tadi,” terang iya.

Maria madahka indu nya sedarka diri kena tipu pengudah saspek diasuh mayar baru RM8,810 dikena ngelepaska barang ti dikirum tang iya lalu nadai nerima barang nya.

Suara Sarawak