KUCHING: Aum Kedua Penggal Kedua Kunsil Nengeri (DUN) Sarawak deka berengkah kena 20 nyentuk 29 November tu ila.
Speaker DUN Sarawak Tan Sri Mohamad Asfia Awang Nassar madahka ba hari ti keterubah pengawa angkat sumpah Kaban Kunsil Nengeri (ADUN) Jepak ti baru Iskandar Turkee deka dipejalaika.
“Nadai aum kena Hari Enam enggau Hari Minggu (25 enggau 26 November) ke alai aum deka berengkah ninting hari pukul 9.00 pagi.
“Aum sekali tu entara aum ti pemadu berat laban bisi dua Rang Undang-Undang baru dibantaika iya ti keterubah dibantaika ba Malaysia,” ku iya.
Asfia bejaku munyi nya rambau aum pemberita Pra-Aum Serimbai Aum DUN Sarawak ba Indu Opis Parti Pesaka Bumiputera Bersatu (PBB) ditu, tadi.
Dulu ari nya, iya madahka bisi lima RUU deka dibantai menteri ngaul pekara bajet 2024, pekara ombudsman Sarawak, rampa menua, idar gas enggau pekara kuasa karan.
