Duruk kelai rayat seati, ku Ali

“Duruk tu ngayanka pemanah serakup enggau penyiru kitai ngibun kaul rat begulai ti udah lama ditanggam.” – Ali Biju.

SARATOK: Duruk tu sebagi ari daya idup asal kitai bansa ti ngemai reti chukup besai sereta agi rat dikemeran nyentuk sehari tu, ku Kaban Parlimen Saratok, Ali Biju.

Ku iya, pengawa berat deka lempung, kereja mar deka nyamai diputar enti dikereja kitai ngena chara beduruk.

“Duruk tu ngayanka pemanah serakup enggau penyiru kitai ngibun kaul rat begulai ti udah lama ditanggam.

“Tu mega nunjukka kitai di Saratok ditu rindu endar begempung, besukung enggau betulungka pengawa pangan diri ti nyadi penegap gempung rayat ditu, dikumbai kitai beduruk,” ku iya lebuh dirandau Suara Sarawak.

Iya mansutka jaku tu lebuh bejaku bejadika Pengerami Makai Lemai Ngiga Belanja Gerija Katolik St. Ignatius’ 2019 di Dewan SJK (C) Min Syn, Saratok ditu, kena malam Hari Enam nyin tadi.

TIBAR PERANSANG… Ali bejaku ba mua mayuh

Ku Ali, penatai bala pengari ari gerija bukai mega bukti nyata pemanah kaul entara kitai ti rindu begulai enggau ngereja pengawa beduruk, nadai ngira pengarap tang rindu ati besaup ngemujurka pengawa.

“Tabi puji ngagai raban Gerija Ignatius’ laban udah berani ngatur pengerami besai baka malam tu sereta kering ati nirika gerija ungkup raban Roman Katolik di Saratok ditu.

“Kitai bela nemu tu ukai pengawa ti muntang dikereja, endang napi mayuh pemar sereta begunaka sukung semua raban nadai ngira ari orang ngatika diri, raban peribit, ejensi enggau opis perintah.

“Laban gerija tu didiri dikena kitai ngempuruka bala, ngerembaika jaku Tuhan, nempa modal mensia ti menyana, ngetanka pengelikun enggau pengelantang pupu bansa sereta nerenak pemanah ulah ngagai semua kitai belalauka pengarap,” ku Ali madah nyemetak.

Kelimpah ari nya ku Ali, Perintah Sarawak empu bisi unit khas ti gawa ngintu pengelantang pengarap ti dikumbai Unit Ungkup Pengarap Bukai (Unifor) lalu ba renggat Perintah Besai apin bisi sebarang unit tauka opis ditumbuh.

KELAI SEATI… Ali disempulang bala bukai melah kek beserimbai enggau Pengerami Makai Lemai Ngiga Belanja Gerija Roman Katolitk St. Ignatius’ 2019.

“Gempung pengarap di menua tu bela tau minta agih belanja ari Unifor laban endang udah bisi diungkupka belanja ngagai kitai ngemujurka sebarang pengawa ngaul pengarap.

“Taja ba renggat Perintah Besai apin bisi utai baka tu, tang aku naka ulih ngatur pekara tu, nya alai arapka semua kitai sabar nganti berita manah dibai aku ari nyin ila.

“Aku mega deka berandau enggau raban gerija nama bagi utai ti patut dibantu enggau begunaka bantu kelebih agi ba pengawa nirika gerija tu,” ku Ali nerang.

Dikena nyukung inisiatif raban gerija nya, Ali udah ngemendarka agih belanja penyampau RM30,000 dikena bebelika ramu nyengkaum besi, atap, semin, batu bata enggau ke bukai.

“Agih belanja tu dikena ngepunka pengawa ngentak gerija ungkup taun tu lalu taun baru deka diperunding baru, enggai nyadi aku besemayaka utai taun baru laban utai apin.

“Nya alai, aku minta bala pengari ari Palan Servis Komuniti Saratok ditu enggau aku empu berunding sereta berandau enggau bala komiti nama bagi utai enggau kereban dikena tauka diguna ngepunka pengawa kita ngambika utai mujur, lanchar sereta ulih tembu nitihka timpuh diperambu,” ku Ali.

Ali mega muji rayat Saratok ti gerah jari nyaup raban gerija ngiga belanja dikena nirika gerija nya nengah sukung bebelika mija enggau pemeri hamper.

Pengerami richah enggau macham rintai program baka lagu solo, suara emas, lagu dipelanja enggau chabut tikit mija benasip enggau chabut tikit benasip.

Sama datai Rev. Fr. Augustine Jepy, bala pengari gerija enggau bala ari Palan Servis Komuniti Saratok sereta lebih 500 iku temuai ke bukai.

Suara Sarawak