KUCHING: Dikena negapka pengawa perintah ngatur senapang patah di Sarawak, Perintah Nengeri ngepun singkang proaktif ngemansang sistem pengkalan data begulai disebut e-Firearm System.

Menteri ba Opis Premier Sarawak, Datuk Seri John Sikie Tayai madah, pengawa ngemansang sistem digital tu siti pengawa ti beguna dipejalai perintah nentuka pengelikun mensia mayuh dijaga sereta ngurang risiko salah guna senyata api kelebih agi ngaul senapang patah.

“Perintah seruran sensitif bekaul sukut pengelikun enggau pengelantang rayat, nya alai pengawa nagang enggau nerit atur ngempu senyata api agi dikemeran.

“Polisi diatu netapka pengawa ngempu senapang patah semina ulih ditukar ari nama apai indai ngagai nama anak lelaki tauka anak indu, lalu pengawa ngena senyata nya semina dikemendar ungkup tuju nyaga asil betanam betupi,” ku iya.

Sikie bejaku munyi nya rambau Nyimpul Jurai Opis Menteri ba Opis Premier Sarawak ba Aum Kunsil Nengeri (DUN) Sarawak ditu, kemari.

Ku iya, perintah mengkang sedia deka berati ke baru polisi enggau atur Permit Carry And Use, ari siti awak ngagai awak bukai ngambi setipak enggau peminta pengelikun sereta gaya menua ke diatu ba renggat baruh.

Sikie madah, e-Firearm System nya dikemansang nyadi pelasar bepalan ti nyimpan sereta nyaga rikod pengempu lisin enggau pengempu Permit Carry And Use nengah chara ti berurun agi.

“Sistem tu ngembuan atur berati ke peminta mindah rejister lisin senapang patah enggau nukar nama pengempu ti sebedau tu begunaka atur manual ti kelalu panjai enggau mayuh kelikuh.

“Nengah sistem nya, atur matau pengelikun, ngatur enggau audit ulih dipejalai efisyen agi, terang sereta ngena integriti nipak transformasyen digital perintah nengeri,” ku iya.

Iya madah, e-Firearm System dipelaba dipejalai belabuh taun baru lalu nyadi siti da pemujur beguna ba digitalisasyen servis bekaul pengelikun.

Sikie nyemetak madah, inisiatif digitalisasyen tu ukai semina deka nambah penyikar enggau pemanah atur tang mega ulih negapka pengandal rayat ba sukut pengelikun senyata api di Sarawak.

Ku iya, perintah pechaya sistem nya deka nyadi pelasar ngatur senyata api ti moden agi, teratur sereta bisi akauntabiliti.

“Inisiatif tu mandang komitmen perintah nentuka senapang patah diatur enggau chara profesional, bisi tanggungpengawa sereta likun dikena nyaga rayat,” ku iya.