MUKAH: Penguna di Mukah diperansang ngena aplikasyen Sistem Subdidi Minyak Makai Elektronik (eCOSS) lebuh meli minyak makai pikit subsidi satu kilogram (kg) dikena nentuka pengawa ngagih minyak nya lurus enggau berurun agi.
Tuai Opis Menteri Dagang Dalam Menua enggau Belanja Idup (KPDN) Pampang Mukah, Salihin Den madah, eCOSS iya nya siti sistem rasmi opis menteri nya dikena ngerikod, matau enggau nyaga pengawa nyual minyak makai subsidi.
Iya madah, nya berengkah ari renggat kilang, murung enggau renchit nyentuk datai ba penguna.
“Sistem tu mantu perintah matau rentayan bekal minyak makai tu ti berurun agi kelimpah nagang penyalah nyual chara belalai.
“Tetiap transaksyen dirikod chara digital lalu ulih muntang agi dipatau perintah,” ku iya.
Pengawa bejalaika eCOSS berengkah nyadi program pemungkal ba bulan Mei 2025 nengah Program Jual RAHMAH di Putrajaya sebedau dikerembai ngagai sekeda nengeri.
Salihin madah, pengawa ngena eCOSS dikena nentuka subsidi semina diasai ke rayat Malaysia ti patut aja nengah pengawa ngenuku identiti sida ngena tinggi.
Sekeda supermakit enggau kedai renchit di Mukah diatu berengkah ngena aplikasyen tu sereta nerima timbal manah ari bala penguna enggau penyual. – RJ
