EFS ke penabat dudi hari

MIRI: Apai indai 42 iku anak mit penerima Skim Wang Turu Pemeri (EFS) ngenataika terima kasih ngagai perintah nengeri laban udah bejalaika inisiatif nya.

Sida tu penerima renggat keterubah wang turu RM1,000 ti di diterima genap anak mit ke patut di bagi menua tu.

Insentif sekali beri tu semina ulih diambi maya umur anak mit nya manggai 18 taun dikena iya nyikap diri nampung pelajar ngagai tikas tinggi agi.

“Terima kasih ngagai GPS laban udah bejalaika inisiatif tu,” ku Azalina Abdullah, 37 taun.

Bela berasai lantang nerima pemeri nya, Rafidah Mohd, 30 taun, ke mega petunggal Azalina.

ALBUM… Datuk Sri Fatimah Abdullah begulai enggau Tony Pui, Ripin Lamat, Dennis Ngau, Datuk Lee Kim Shin enggau Rosey Yunus begambar enggau bala indai sereta anak mit penerima EFS di Miri, tadi.

Seduai bela datai ngemai anak ti baru beumur sebulan enggau empat bulan.

“Kami bela gagit sereta berasai lantang ba inisiatif dipejalaika Perintah Sarawak tu,” ku Rafidah.

Kepala Menteri Datuk Patinggi Abang Johari Tun Openg udah ngemendarka pekara tu lebuh mantaika Bajet Nengeri dalam bulan November taun nyin tadi.

Pengawa sehari nya udah dipenyadi Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah.

Ku Fatimah, naka 25 April taun tu, sepenyampau 5,070 iku anak mit baru ada tauka 49.14 peratus ari 10,317 udah direjista di baruh inisitif EFS tu.

SAMA BETULUNG… Datuk Sri Fatimah Abdullah nyuaka pemeri Gawai-Raya ngagai siku ari penerima.

“Kuching ngerikod penyampau anak mit pemadu tinggi rejista ungkup program tu ke bisi 1,980 iku, ditangkan Sibu (950), Miri (659), Bintulu (267), Sarikei (260), Sri Aman (223), Mukah (201), Limbang (178), Betong (118), Kapit (107), Serian (66) enggau 61 di Samarahan,” ku iya.

Nya alai, iya meransang apai indai ngambi rejista anak sida ke baru ada ngambi bela ampit inisiatif tu laban Perintah Sarawak ngagihka belanja penyampau RM40 juta ungkup taun tu.

“Semua anak mit Sarawak ti patut nerima EFS tau rejista di 52 pampang Opis Pengerejista Bansa (JPN),” ku iya.

Iya mansutka jaku tu rambau program ‘Sejambak Kasih Gawai-Raya’ enggau pengawa nyuaka EFS di Hotel Dynasty ditu tadi.

Ngelansa pasal program ‘Sejambak Kasih Gawai-Raya’, 200 iku udah nerima hamper enggau ‘duit Gawai-Raya’ penyampau RM100 siku.

Program diatur ninting taun tu asil kerejasama entara Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit enggau Hotel Dynasty dikena mantu ngelempungka tating belanja bala penerima dikena ngerami Gawai-Raya.

“Sepenyampau 30,750 iku nerima bantu ungkup Gawai Dayak seraya 15,626 ungkup Hari Raya di selampur Sarawak.

“Di bagi menua tu, bisi 2,318 iku penerima nerima bantu Gawai seraya 850 iku ngerami Raya,” ku iya nerang.

Kelimpah ari nya, bantu ninting bulan disediaka Opis Pengintu Pengelantang Mensia Mayuh (JKM) Sarawak, ari bulan Januari nyentuk April taun tu bisi 56,096 iku penerima ngaul belanja manggai RM67.3 juta.

Sama datai Menteri Muda Orang Indu, Ruang Bilik enggau Pemansang Anak Mit Rosey Yunus, Menteri Muda Dagang Temuai, Seni enggau Main Asal, Datuk Lee Kim Shin, Adun Lambir Ripin Lamat, Adun Telang Usan Dennis Ngau sereta Direktor Pengatur Pengawa Hotel Dynasty Tony Pui.