KUCHING: Komiti Besai Pengawa Bepilih (SPR) minta sebarang ejensi perintah, Gerempung Ukai Dikuasa Perintah (NGO) tauka sida ti deka nyadi pengemata ungkup Pengawa Bepilih Mit (PRK) DUN Jepak.
Sapit Chairman SPR, Dr. Azmi Sharom madah, sida deka ngemata pejalai PRK nya berengkah ari hari nganjung nama chalun nyentuk pemutus pengawa bepilih dibantai.
“Sida dikemendar ngemata baka ba palan nganjung nama chalun, palan ngundi, palan ngira undi enggau palan ngumpul undi rasmi sereta meseti nitihka semua atur nyiri ti udah ditetapka,” ku iya nengah sebengkah penerang pengudah Aum Khas SPR dikena netapka PRK DUN Jepak, ditu tadi.
Ku iya, penerang silik enggau pom peminta nyadi pengemata ulih diambi ari Portal SPR www.spr.gov.my berengkah kemari enggau haribulan kepenudi peminta nya kena 9 Oktober tu.
Nambahka nya, Azmi madah, SPR deka neruska pengawa mantaika pejalai pengawa bepilih nengah live streaming ungkup palan/arung ngundi ti dipilih ba ruai Facebook SPR baka ti dipejalai lebuh pengawa bepilih sebedau tu.
Dikena meransang pengundi bejalaika tanggungpengawa sida maya hari ngundi, iya madah, SPR deka bejalaika Kimpin Aram Kitai Ngundi nengah bemacham media nyengkaum ba media elektronik, media rama, ngitang banner ba palan strategik enggau palan bukai ti engkeman.
