Emas ari Bau kelia pemadu bekualiti

BAU: Tasik Biru, urung 35 kilometer ari mengeri besai Kuching iya nya sebengkah palan endur ngali emas ke pemadu jelai rita sereta ngembuan mayuh cherita ke mayuh enda ditemu orang.

Nama asal Tasik Biru iya nya Tai Parit, dalam jaku Hakka ngembuan reti parit besai, ngundan emas pemadu manah sereta bekualiti di dunya.

Kebendar iya semina tasik digaga mensia asil ari pengawa ngali emas dikereja raban pengali China Bau tauka dikelala enggau nama kangau Tai Parit Kunsi urung pun abad ke-19.

Pengawa ngali emas ba Tasik Biru udah nya diambi Borneo Company Limited, ngen anaa Tai Parit Goldmine ari 1898 nyentuk 1921.

Sebedau pengawa nutup Palan Ngali Tai Parit, J. S. Geikie, siku ari orang geologi ba Serikat Borneo Litimitd melabaka penyampau tekang emas ke agi bisi dalam Thai Parit iya nya 28, 000 tan tauka 7,700 auns emas.

Pengawa nutup Tai Parit nyadi sebagi ari palan ngali emas laban pengawa ngali palan nya udah kelalu dalam manggai 200 kaki penalam ke baruh tanah.

Penalam tu ngujungka entali ai na baruh tanah pechah kelimpah palan ngali nya ditenggelam ai.

Beduduk ari pengawa ngepam ai pansut ari tasik nya begunaka belanja ke besai, dia Serikat Borneo Limited ngaga pemutus nutup palan ngali emas nya.

Pengudah palan ngali emas nya kena ampuh bah ba taun 1921, dia mayuh cherita berantu didinga bekaul enggau tasik nya.

Entara cherita ke kala nyadi ditu iya nya sebuah bas dipenggi Bau Transport Company ke ngunda 67 iku penumpang labuh ngagai Tasik Biru kena 7 Jun 1979 urung pukul 12.50 tengah hari lalu bisi 28 iku nembiak sekula nyengkaum siku pengajar ke benung belatih ngajar mati lemas.

Nangkan 37 iku nembiak sekula ke bukai, nyengkuam deriba bas enggau tukang nyadung tiket bas selamat. Penusah tu nyadi, kenu ku cherita orang tuai kelia bekau ari peminta Raja Tanah ke ngiga siku mensia ninting dua taun awak nyadi jaga iya.

Nitihku cherita orang ke besemak enggau menua nya mega, tasik tu bisi diuan tekura emas, nya alai iya chukup dikerinduka mensia mayuh.

Nya alai, cherita lama bukai ke kala didinga iya nya Tasik Biru tu dikaitka enggau cherita penatai tiga iku antu gerasi urung taun 1988 ke ngembuan pemesai tiga meter pemanjai dipeda nyemerai ba baruh tasik ti ngujungka pemanah rampa menua maya nya nyadi chelum sereta ngenakut.