Dulu kelia, Tasik Biru di pelilih mit menua Bau iya nya siti palan gali emas ti tebilang di nengeri Sarawak.
Ungkup bala ti baru nemu bekaul Tasik Biru tu, palan tu udah kala digali serikat ari menua ribai laban deka bejalaika pengawa ngali emas.
Tasik tu ngembuan emas ti dipelabaka pemadu manah sereta bekualiti di dunya.
Taja pia, tanah tusur udah nyadi ba beberapa iti endur di sitak Bau nyengkaum ba palan lama Sekolah Rendah Kebangsaan (SRK) Bau bekau ari pengawa ngali emas di tasik tu kelia.
Empas ari pengawa tu, rayat ba pelilih tu enda puas ati lalu enda nyukung kereja bejalaika pengawa ngali emas.
Taun 1998, ai diisi baru ke dalam tasik tu lalu kereja ngali emas diketuka lalu ngujungka penyadi tanah tusur badu nyadi ba menua Bau.
ENSERA TASIK BIRU
Tasik Biru ti kira-kira 35 kilometer ari mengeri besai Kuching dipelaba nyimpan ensera rayat bansa Bidayuh madahka tasik tu nyadi palan diau tekura emas ti ngujungka palan tu ulih narit mensia mayuh datai kitu.
Nangkan ke nya mega,Tasik Biru mega dikaitka enggau misteri tiga iku antu raya ti dijangka tiga meter pemanjai idup ba baruh tasik tu maya taun 1988 ti ngasuh rampa menua ba palan tu berantu sereta ngasuh orang remban.
Taja pia, pemanah menua Tasik Biru pulai nyadika remban ngagai mensia mayuh lebuh aksiden ti ngaul sebuah bas sekula tepawah ke dalam tasik tu. Empas ari aksiden tu, sepenyampau 28 iku nembiak sereta dua iku pengajar ba urung taun 1980-an diripotka bebadi.
Bekau ari aksiden nya, Tasik Biru ditutup ngagai mensia mayuh lalu pengawa ngali emas dipejalaika baru nyentuk pun taun 2000.
PALAN DAGANG TEMUAI
Taja pia, operasyen palan ngali emas ti diketu ka empas ari bah besai ti nyadi urung taun 1921 udah dibuka ngagai mensia mayuh nyadi palan dagang temuai maya 21 April 2001.
Sepengudah nya, tasik ti ngembuan 91 meter penalam sereta pemesai enam hektar tu udah mujur ditemu mensia mayuh.
Baka tasik bukai mega, pengawa bejalaika kereja ngemanahka tasik tu urung taun 2000 ulih narit mensia mayuh singgah meda rampa menua ti kala nyadi palan ngali emas kelia.
Tasik tu dikangau Tasik Tai Parit sebedau ditukar nyadi Tasik Biru urung 1970-an.
Diatu tasik tu dibuka baru enggau nyedia mayuh macham perengkaguna ti ulih dikena mensia mayuh lebuh nemuai baka bilik agu, palan pemakai, taman bemain nembiak mit sereta mayuh macham agi.
Palan tu dibuka ngagai mensia mayuh ti deka raun sereta ngelantang ati enggau diri sebilik seraya meda tasik digaga mensia ti bechurak biru ti ngembuan bemacham jerita ti udah kala nyadi ba dalamnya.
Urung taun 2021,baka digaga terapung atas ai, Tasik Biru di Bau deka digaga ngembuan ‘Floating Chalet’ baka di Kukup Mangrove, Pontian Johor.
Kitai suah amat meda sereta ninga orang becherita bekaul chalet terapung baka di menua tebilang baka Maldives enggau Langkawi.
Juluk ati bala kita ke deka ngasai bemalam ba chalet terapung deka nyadi nyata enda lama agi laban Roxy Hotels udah nesau chalet terapung deka dibuka ba atas tasik ti ngembuan mayuh emas di Sarawak iya nya Tasik Biru di Bau.
