Empat buding baru di SMK Tebakang tembu dalam 8 bulan

SERIAN: Empat buah blok buding Sekula Sekondari (SMK) Tebakang deka digaga baru enggau diseruri dalam timpuh lapan bulan.

Sapit Menteri Wang ll Malaysia, Mohd Shahar Abdullah madahka SMK Tebakang semina repuk ba begunan buding aja.

“Nya alai, Opis Menteri Kereja Raya udah ngaga perambu ti amat manah laban ngambi kira sentang kapsiti ti betambah ba sekula tu ke alai sida nambah ari 150 palan ngagai 200 palan ulih ditangkup buding baru nya ila.

“Terima kasih ngagai JKR Sarawak laban meretika peminta Opis Pelajar enggau rega ‘siling’ RM3 juta lebih,” ku iya.

Shahar bejaku munyi nya ba aum pemberita pengudah Program Ngelawa SMK Tebakang ditu, tadi.

Kenu ku iya, pengawa mansutka tender projek enggau nyiri kunteriktor deka digaga enda lama agi.

“Pekara pemadu beguna ba aku ngagai buding tu iya nya awakka meri pangka ti manah ngagai bembiak ba menua pesisir,” ku iya.

SMK Tebakang bisi ngembuan urung 1,340 iku nembiak sekula enggau urung 86 iku pengajar.

Taja pia, majoriti nembiak ba sekula nya diau ba buding iya nya bisi 987 iku.

Kediatu buding ba sekula nya bisi sepuluh blok ke alai nembiak indu bisi enam blok enggau nembiak lelaki bisi empat blok.

Tang blok ti deka digaga baru enggau diseruri ba sekula nya semina tiga blok buding nembiak indu enggau seblok buding nembiak lelaki.