Empat rumah di Sungai Apong angus

KUCHING: Empat buah rumah dituntung penusah angus di Jalai Selangan Batu, Sungai Apong urung jam 12.20 pagi kemari.

Bisi 11 iku sida ti diau nguan rumah nya diripotka selamat.

Pemangku Mandal Direktor Bomba enggau Penyah Penusah Tiong Ling Hii sida nerima kangau urung jam 12.22 pagi.

“Bisi dua buah perengka pengangkut penyah penusah dianjung ngesah penusah nyengkaum Balai Bomba enggau Penyelamat (BBP) Tabuan Jaya enggau BBP Padungan.

“Kami ngambi awak urung setengah jam ngerara api,” ku iya.

Ku iya, bisi 22 iku raban Bomba ngulu dalam operasyen madamka api kelimpah kerejasama ari Polis Diraja Malaysia (PDRM) enggau Sesco.

Tandu iya, pun penusah nya agi dalam pansik.

ENDA DISADANG…Empat buah rumah ba endur nya bela angus lengis.