KUCHING: Kes positif Covid-19 di Sarawak ngerikod enam kes positif baru lalu ngujungka bisi 414 kes positif kenyau kes keterubah diripot kenaka 13 March 2020.
Ari penyampau enam kes nya, empat di Sepital Besai Sarawak (SGH) lalu dua di Sepital Bintulu.
Sapit Kepala Menteri Datuk Amar Douglas Uggah Embas madahka bisi 105 kes baru Pesakit Agi Dipatau (PUI) diripotka kemari lalu 126 kes agi nganti pemutus makmal.
“Naka sehari tu, bisi empat kes positif udah gerai sereta dikemendarka pansut ari sepital lalu ngujungka bisi 68 kes udah pansut ari sepital.
“Semua kes ke udah dikemendarka pansut nya ari SGH,” ku iya ti mega chairman Komiti Penyangga Penusah Ngenyit Nengeri (JPBN).
Uggah madah munyi nya ba aum pemberita di Wisma Bapa Malaysia ditu, lemai tadi.
Nangkan nya ku iya, piak polis udah ngetanka 141 iku orang ke ngelaban Atur Mindah Betagang (PKP) ba nengeri tu, kemari.
“Ari penyampau nya, 45 ditan di Kuching, Padawan (22), Miri (18), Mukah (6), lima di Kota Samarahan, Sarikei enggau Limbang.
“Kelimpah ari nya, empat di Sibu, Saratok enggau Maradong, tiga di Serian, Betong enggau Kapit, dua di Bintulu, Bau, Lubok Antu, Simunjan, Belaga enggau Dalat lalu siku di Sri Aman enggau Julau,” ku iya.
Kenyau atur PKP diteritka ba menua tu kenaka 18 March tu tadi, bisi 1,235 iku udah ditan ba nengeri tu laban ngelaban atur nya.
