SERIAN: Opis Tanah enggau Survei (JTS) mujur ngeluarka empat surat Gazet Rizab Komunal Bumiputera Seksyen 6 Kanun Tanah Nengeri (KTN) di baruh inisiatif nyukat tanah baru ngagai enam sitak menua ditu.

Enam buah kandang menua tu iya nya Kampung Murud Plaman enggau Kampung Murud Mawang (digazetka ba baruh Kampung Murud Plaman Serian), Kampung Sumpas (digazetka di baruh Kampung Sumpas Serian), Kampung Reban enggau Kampung Lubok Ria (digazetka di baruh Kampung Reban enggau Lubok Ria Serian) enggau Kampung Paon Sungai Rimu (digazetka di baruh Kampung Paon Rimu Serian).

Gazet rizab nya ngaul 877.13 haktar tanah ari komuniti Bidayuh enggau Melayu di Serian.

Kelimpah ari nya, JTS mega mujur ngeluarka 835 Surat Pala Tanah Seksyen 18 KTN di baruh inisiatif baru ngagai 653 iku peranak asal di Serian ungkup lot tanah dikena betanam betupi.

Bisi empat buah kandang menua bekaul iya nya ari Kampung Pichin Serian, Kampung Engkeroh Serian, Kampung Petag Padawan enggau Kampung Beradau Siburan.

Komuniti penerima tu ngaul bansa Bidayuh, Iban enggau Melayu di kandang menua nya.

Nangkan nya, JTS mega ngeluarka 320 Surat Pala Tanah Seksyen 18 KTN dibaruh sukat Kampung Tradisional ngagai 291 penerima ari Kampung Murud Plaman Serian, Kampung Menjau Siburan enggau Kampung Kuang Siburan.

Pengawa kepenudi, JTS ngeluarka Lisin Genturung Pendiau Sementara (TOL) Bagi Menua Serian enggau Samarahan ngagai 75 iku penerima ari TOL Kampung Simpok Padawan sereta TOL Kampung Bintawa Sungai Bari enggau Kampung Bintawa Lama Serian.

Surat Gazet Rizab Komunal Bumiputera (Betanam Betupi) Seksyen 6 KTN, Surat Pala Tanah Seksyen 18 KTN enggau Lisin TOL nya disuaka Sapit Premier Sarawak ti mega Menteri Pemansang Mengeri Enggau Pengeraja Asal Kedua Datuk Amar Awang Tengah Ali Hasan ba Balai Tayung Langui di Kampung Pichin, Serian kemari.

Ungkup rikod, di Sarawak JTS udah nyukat tanah Seksyen 6 KTN di baruh inisiatif baru penyampau 1,040,212 hektar ke alai tanah ti udah dikeluarka surat gazet penyampau 800,176 hektar.

Nangkan nya ba sitak Serian, naka 31 Julai tanah ti udah disukat bisi 81,059 hektar ke alai tanah ti udah digazetka bisi 78,125 hektar.

Ungkup surat pala tanah Seksyen 18 KTN di Sarawak, JTS udah nyukat tanah NCR inisiatif baru penyampau 66,998 hektar tanah ke alai 42,924 hektar udah dikeluarka surat pala tanah.

Ba Serian empu, naka 31 Julai tanah ti udah disukat bisi 4,804 hektar ke alai 1,886 hektar tanah udah dikeluarka surat pala tanah.