KUCHING: Bini ex-Tuai Pemegai Menua (TYT) Nengeri Sarawak Tun Pehin Sri Abdul Taib Mahmud, Toh Puan Datuk Patinggi Raghad Kurdi Taib nyemetak madah ke diri enda ninggalka menua tu sereta deka nampung pengawa pengasih ungkup rayat Sarawak.
Pia ku jaku dipansutka iya nengah surat nuju rayat nengeri tu, lalu minta semua raban badu ngemanaka berita dikerembai sebelah media rama ti madahka iya mai Tun Taib pansut ari sebuah sepital pakar ditu enggau melakangka lutur.
“Anang pechayaka sebarang berita selebubu ngapa pasal aku.
Taja aku orang menua luar, tang diatu aku rayat Malaysia lalu deka seruran nyadi rayat menua tu.
“Aku enda deka ninggalka Malaysia lalu deka nampung pengawa pengasih ngagai rayat Sarawak pengudah Tun Taib pulai gerai, Insya Allah,” ku iya ba siti surat ti dikunsi ngagai media urung pukul 1.21 dini hari tadi.
Surat nya dikeluar pengudah iya ningkah berita nya nengah Instagram iya lalu nyangkal berita iya mai laki iya pansut ari sepital melakangka jaku lutur.
“Kenyau ari beberapa hari ke udah, gambar enggau berita portal dalam media sosial ti ngamahka nama aku ke nyadi bini ex-TYT.
“Semina siti aja pekara ngirauka ati aku diatu iya nya pengelantang laki aku, Tun Taib.
“Nya alai, aku enggau ati baruh minta kita badu ngaga peragam enggau betenah laban pekara dikenatika aku diatu nyaga laki aku,” ku iya.
Iya mega minta semua rayat Sarawak besampika pengelantang enggau pengerai Tun Taib.
