Ensera 1: Apai Sali besilih rumah enggau Apai Seumang Umang

NYADI sekali dia deh tudah Apai Sali tak bersasai lelenggau bendar ati ka nemuai ngagai unggal iya Apai Seumang Umang.

Iya pan lalu madah ngagai bini iya Enchelegit madah kediri ka nurun nemuai ngagai Apai Seumang Umang, laban naka iya ke bisi nemuai ngagai Apai Seumang Umang iya nya lebuh iya ti dibai sida Apai Seumang Umang makai belauk paku.

Udah nya iya lama enggai nemuai laban bedau nyamai ati ngumbai diri dikeduan sida Apai Seumang Umang tegal iya ti tuyu enda nemu bagi paku ke tau ke lauk.

Laban ti rangka, Apai Sali lalu abis betu ka makai belaukka paku lawang ke ulih iya mabut ba langkau tembawai sida.
Mupuk meh kenu ku ensera Apai Sali ngejang ke rumah sida iya lalu enggau naka pengelantang ati.

Nyau baka burung ku munyi ensung Apai Sali belagu betiti ka jalai laban ke merindang diri ngambi ke enda berasai datai ba rumah Apai Seumang Umang.

JOHN ADAM GILBERT

Nyau umbas iya ga nyau perenching ku gamal kening Apai Sali laban peluh, iya pan lalu datai ga ba kaki tangga sida Apai Seumang Umang.

Datai iya ba kaki tangga sida Apai Seumang Umang iya pan lalu nyapa.

“Oi Unggal ! Nyadi rumah nuan tu. Tau ditiki kami temuai ga rumah nuan tu Unggal?

“Eh! Rumah ke nyau baka tansang manuk pa penyai,” ku Apai Sali ngangau ari tanah.

Alai iya tak bengat ngenyai nya jaku laban seduai iya Apai Seumang Umang endang nadai kala bejaku manah nama betemu enggau pangan diri.

Dulu munyi ke belaya baru kitai ninga seduai iya meruan utai dikerandau.

“Tau Unggal ah! Anang takut! Nadai penti nadai pemali rumah aku di tiki nuan sehari tu,” pia ku saut Apai Seumang Umang.

Iya tekenyit ninga nyawa Apai Sali laban pa pengelama iya nadai ninga Apai Sali bejaku.

Apai Sali pan lalu niki ka rumah Apai Seumang Umang. Datai iya di rumah lalu diduduk ka Apai Seumang Umang laban endang ke baka adat asal kitai Iban nundukka temuai ke bisi datai.

“Lalu Unggal lalu, ditu tua duduk nungga sarang pinang tu,” pia ku Apai Seumang Umang gaga nyambut penatai unggal iya Apai Sali.

“Keba ka datai, endang sigi ka lalu, endang ka duduk meh aku, dini tua ka nyadi tak berandau bediri deh unggal baka adat China di pasar din.

“Apo lapa rumah nuan tu tak jai bendar deh Unggal. Nyau baka tansang manok peda aku” Pia ku Apai Sali.

“Eh nya meh Unggal, rumah ga baru temu. Rumban digaga kami menyanak sekumbang ke udah tembu ngetau tu tadi.

“Nadai ari begiga ke ramu manah kena berumah,” pia ku Apai Seumang Umang nyaut enda bebendar laban malu ninga rumah diri di bantah Apai Sali.

Nyadi rumah Apai Seumang Umang tu digaga betiang ke buluh lalu dinding enggau gelegar iya nya digaga ari buluh payan tesap.

Lalu Atap rumah nya daun mulung tusuk. Semua batang tiang rumah Apai Seumang Umang tu nyau baka teling belubang ditebok bubuk.

Atap rumah iya pan nyau dipeda langit laban ti jarang bendar tusok atap nya digaga Apai Seumang Umang.
Nama agi deh seduai iya pan lalu bekenang ke mayuh macham cherita laban ti lama udah enda kala betemu.

Nyau kelama seduai iya ke udah berandau dia Apai Sali nyau rindang diri laban nadai ka mindah ke bukai laban rumah Apai Seumang Umang nya chukup chelap lebuh ti dipuput ribut.

Chukup rindu iya diau ba rumah Apai Seumang Umang nya. Sekali tak lalu betiup angin ari timur barat mangkaka rumah Apai Seumang Umang.

Nyau lelundai ku asai sanggoul buk Apai Sali seduai Apai Seumang Umang ke betungga duduk nya dipuput rebut.
Sekali tak lalu bemunyi semua tiang rumah Apai Seumang Umang ke udah ditebuk bubuk nya tadi.

Nadai utai ngemanah manah nya munyi. Nyau betimbal timbal munyi lubang tiang nya dipuput ribut.

Tak tebelenga Apai Sali ninga munyi tiang nya laban nadai kala ninga tiang tau tak nyau nemu bemunyi sereta ngerinduka ati iya.

“Akai Unggal! Dini nuan meli tiang rumah nuan tu tak ngemanah nya tau nemu bisi munyi kena merindang ati,” ku Apai Sali nanya Apai Seumang Umang.

“Eh nadai nya deh Unggal ! Tiang ulih aku ngudar ari menua tasik lebuh maia sida Keling ke bisi nurun pegi suba,” pia ku saut Apai Seumang Umang.

“Apoo pama nuan Unggal ulih ngudar tiang ari menua tasik,” ku Apai Sali.

“Nya nuan tadi nemu ngumbai rumah aku tu nyau baka tansang manuk. Enggi nuan din dini nya bisi baka rumah aku tu.

“Iya ga chelap sereta nemu bemunyi enti dipuput ribut,” pia ku Apai Seumang Umang ga nimbal Apai Sali.

“Au enti baka tu Unggal, besilih rumah ga tua. Nuan beempu enggi aku nyin, sama ga nya rumah,” pia ku Apai Sali.

Nyadi rumah Apai Sali di gaga betiang ke batang teras, lalu geladak iya nya digaga ari kayu nyatu ti udah disayat nyadi ka papan.

Lalu atap rumah iya nya ngena atap kajang ke diserak ngena atap mulong tusok. Tak naka iya pemesai sereta penegap ku ensera gaya rumah Apai Sali tu tadi.

“Oh enggai aku Unggal, tak baru udah tembu rumah aku tu, iya ga nya rengka ulih aku ngudar ari menua tasik,” pia ku Apai Seumang Umang ngaga diri enggai.

“Eh! nadai nya utai di ke enggai ke nuan Unggal. Kena aku nambah ke nya nuan beempu tajau aku tiga igi ga enggaika nuan tak berasai rugi,” pia ku Apai Sali ngumbuk Apai Seumang Umang.

“Enti munyi nya Unggal, nyadi meh tua besilih rumah tang nuan anang nganu aku ti nuan bisi rugi ila lusa tegal pengawa tua tu,” pia ku Apai Seumang Umang.

“Enda Unggal, terima kasih naka iya aku ke nuan ti kasih sereta sinu ke aku ke ka dibai aku besilih rumah,” ku Apai Sali enggau ati gaga.

Betampung…