KUCHING: Perintah Sarawak keran nampung pemansang atlit pengudah Lumba Malaysia (SUKMA) nengah program pemansang penau timpuh panjai nentuka sida besemekih ba renggat nasional enggau antarabansa seraya nyendiaka peluang pelajar sereta kereja.
Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, pemansang atlit enda patut ngetu pengudah SUKMA, tang patut ditampung dikena nempa atlit nyulut.
“Opis Menteri Nembiak, Lumba enggau Pemansang Orang Dagang Sarawak (MYSED) keran nentuka pemansang atlit enda ngetu pengudah SUKMA, tang majak dikemansang nuju jalai pemansang timpuh panjai nyentuk renggat nasional enggau antarabansa,” ku iya.
Rentap madah munyi nya lebuh nyaut tanya Kaban Kunsil Nengeri (ADUN) Telian, Royston Valentine ba Kunsil Nengeri (DUN) Sarawak, ditu, kemari.
Iya madahka atlit mega diberi peluang nampung pelajar enggau kereja ba bidang lumba, nyengkaum nyadi jurulatih, pakar fisioterapi sereta pakar nyaga pemakai.
Ambi ke chunto, ku iya, Datuk Pandelela Rinong ti ngembuan degree ba bidang Sains Sukan dan Pengurusan ari Universiti Malaya sereta ex-atlit squasy nasional, Mohd Azlan Iskandar ke diatu bisi gimnasium kediri empu.
“Ari sukut kereja, mayuh peluang ba bidang lumba laban sida ulih nyadi jurulatih, pakar fisioterapi, pakar nyaga pemakai enggau ke bukai,” ku iya.
Ku iya, ba Lumba SEA ke deka datai ke alai Sarawak nyadi tuai rumah ungkup 18 achara lumba mega meri peluang ngagai atlit ngambi meri servis ngagai bala penyereta nyengkaum sukung ngagai pekit antarabansa baka Kuching Marathon, Layar Cycling Carnival enggau IBF World Youth Bowling mega meri peluang ngagai staf teknikal.
“Tu mega peluang ukai semina ngagai atlit, tang mega ngagai raban teknikal ti nyadi pemun,” ku iya.
Entara atlit Sarawak ti ngari ke Malaysia ba renggat antarabansa iya nya Nur Hazirah Ramli ba main boling tenpin, Bertrand Rhodict Lises enggau Elvis Priestly Clement ba lumba terejun enggau Jonah Chang Rigan ba lumba nikau leka bedil.
