KUCHING: Librari Nengeri Sarawak enda tau enda ngerembaika servis sida ngagai komuniti menua pesisir.
Kaban Kunsil Nengeri (ADUN) Tamin, Ir. Christopher Gira Sambang madah, nya dikena nentuka peranak kelebih agi nembiak di rumah panjai bepeluang macha bup ti bekualiti sereta ngena kereban belajar ti tau dikearapka.
Ku iya, genturung pendiau ti jauh ari librari besai enda patut nyadi penekul ngagai peluang bala anak ngulihka pelajar sereta ngiri penemu.
“Librari Nengeri Sarawak begunaka pengawa ngaku program ‘outreach’ ti tetap ba kandang menua Tamin enggau Selangau nengah kerejasama sekula enggau tuai komuniti dikena ngelakuka budaya macha ngagai bala nembiak.
“Program nya tau nyengkaum servis librari mindah kin kitu enggau nyendiaka sitak macha ba balai mensia mayuh enggau ruang rumah panjai ti engkeman,” ku iya.
Gira bejaku munyi nya lebuh bejuraika RUU Librari Nengeri Sarawak (Ubah) 2026 ba Aum Kedua Penggal Kelima Kunsil Nengeri (DUN) Sarawak ba Kompleks DUN ditu, tadi.
Ku iya, aktiviti macha ti seruran dipejalaika sereta koleksyen bup ti seruran dikemaru mega ulih narit pengerindu nembiak macha.
Iya mega meri langgur penemu ngena servis digital dikena nyukung program tu, nyengkaum nyendiaka kereban belajar ti ulih dibatak (download) lalu ulih dibacha taja nadai sambung internet ba kandang menua ti ngembuan akses internet ti bedau entap.
