KUCHING: Agih belanja sepenyampau RM200 juta dikena bejalaika pelajar tinggi pechuma di Sarawak taun baru mandangka pengeran perintah nengeri ngemansang modal mensia landik ngambi tetangkupka peminta ekonomi dudi hari.
Penganalisis enggau pemerati politik Sarawak, Datuk Peter Minos madahka pengawa meranak puku ba pelajar nya beguna amat dikena nempa mayuh agi raban profesional enggau pakar ti ulih nyungkak industri sereta pemansang nengeri.
Ku iya, Sarawak ngembuan mayuh pemansut asal, tang pengulih nya meseti disukung pengereja landik nentuka pemansut nya ulih dikena enggau manah.
“Nengah pelajar tinggi pechuma, Sarawak deka nempa mayuh agi pengereja profesional landik berapa taun da.
“Kitai deka begunaka raban landik enggau pakar ngambi mansang jauh agi, nambah industri sereta nyadi nengeri ti maju agi,” ku iya.
Minos mansutka jaku nya lebuh dipinta ngelansa Bajet Sarawak 2027 ti dibantai Premier Sarawak, Datuk Patinggi Tan Sri Abang Johari Tun Openg di Kunsil Nengeri (DUN) Sarawak, Hari Satu tu tadi.
Ku iya, peneleba menua maju nyengkaum Singapore mandangka pemansang modal mensia nyadi entara kebuah besai nyapai pemansang ekonomi taja bisi pemansut asal ti betatak.
Iya madah baru, Sarawak ulih nyapai pemujur besai agi nyema pengaya pemansut asal nengeri digembar enggau pengelebih, pengelandik enggau penau rayat.
“Enti kitai ngempung pemansut asal ti dikembuan ngena penau enggau pengelandik, Sarawak ulih nyapai penuduk ti tinggi agi,” ku iya.
Nambah ke nya, iya madahka langgur numbuh Kaunsil Pelajar Sarawak nyadi inisiatif besai negap pengawa nyeraris polisi enggau program pelajar ba nengeri tu.
Ku iya, pengawa nyeraris nya ulih nyaup nentuka pemansang pelajar dipejalai berurun enggau begulai agi ngambi tetangkupka peminta sereta pemansang Sarawak dudi hari.
Ku iya, langgur pelajar ti nyengala enggau bisi tuju beguna amat dikena nyeliah pengawa bejalaika polisi enggau program ti enda meri empas seraya nentuka inisiatif pemansang modal mensia meri mayuh asil.
Minos mega muji inisiatif perintah nengeri ti meri perati ngagai pelajar rayat seraya madahka pengawa meranak puku ba sektor nya nyadi inisiatif besai nyikap Sarawak napi pemar ekonomi enggau pemansang dudi hari. — RUSNAN MUSTAFA
