TUSUN 21

PENGUDAH Abak mupuk pulai ke rumah panjai sida di Gelong, apai tuai orang nya mansang ngagai palan alai Kumang bebasu gari.

Iya ngambi ujung kain ba punggung lalu dibasu iya dia. Udah nya, iya ngulurka kaki ba lubuk alai Kumang mandi, peda nyau parai magang tudah ikan ti bisi ba lubuk nya.

Pia mega, ikan ke pemadu dikesayau ke Kumang pen bela parai.

Semua ikan ke parai nya nyau melepung ba sebelah lubuk endur Kumang mandi nya.

Meda ikan dalam lubuk nya nyau parai magang, apai tuai orang nya ngumpul semua ikan nya lalu dibuai iya ke tebing.

Ba rumah panjai Gelong, bala nembiak ke bukai mendingka cherita Abak ti madah ke apai tuai orang mandi ba lubuk endur Kumang mandi.

Pengudah mendingka cherita nya, sida nyau takut sereta nguji mansik pengamat cherita ti ditusui Abak.

Sekeda nembiak bukai bisi ati deka nyubuk apai tuai orang nya ke mandi ba lubuk pemandi Kumang nya.

Lebuh sida nyau semak endur nya, sida ngumbai apai tuai orang nya nubai ikan laban mayuh amat ikan parai ba lubuk nya.

Meda baka nya, sida berumban pulai ke rumah panjai lalu nusui ngagai bala bukai ba rumah panjai nya.

Siku ari nembiak nya tadi beguai nusui pekara nya ngagai Ngelai Orang Besai Bisi Pengeraja Nadai Banding, Tunggul Tegar Mai Bisi Sebaka Naning.

“Ikan kitai nyau abis parai ba pendai ketegal ditubai!” ku iya madah ke siku nya.

Ninga munyi nya, Ngelai angkat sereta madah ngagai Renggan Tali Kayu Lebah ti Tinggi, Rembuyan Tumbak Tajam Berani Nusuk Ati iya nya siku Bujang Berani menua Gelong.

“Enti kita amat berani, tangkap mih orang ke berani amat nubai ikan ba ai kitai, tangkap iya!

“Kitai patut ngukum iya nyadi dua tauka tiga bagi,” ku Ngelai.

Enda lama udah nya, Ngelai nyengkau ilang enggau terabai iya lalu mansang ngagai lubuk endur Kumang mandi.

Iya bela disempulang semua bala bujang berani ari rumah panjai Gelong.

Bala sida ke indu di Gelong mega bela nitih entudi jauh ari belakang.

Lebuh datai ba lubuk endur Kumang mandi nya, sida meda ikan ba lubuk nya nyau abis parai magang nadai ngira besai tauka mit.

Bangkai ikan nya tadi nyau ngachir ba sebelah nebing lubuk nya.

Ikan tengas tampak emas ti pemadu dikesayau ke Kumang enggau Lulong mega bisi ayan melepung nyau parai.

“Kita ke lelaki enda tau enda nguji enggau naka ulih munuh iya.

“Tu nadai utai enti dibanding enggau lebuh kita nurun ngasu pala lalu ngelingi jelu ke dibunuh kita tauka lebuh kita ngayau munsuh kitai lalu ngalahka menua sida,” ku indu nya sebelah tisi nyau ngeredakka nyawa.

Meda baka nya, Ngelai berumban nuju apai tuai orang nya lalu dientudi ke Renggan enggau bala bukai.

“Oo unggal, nama pengawa kita?” tanya apai tuai orang nya sambil iya malik ngagai Ngelai seduai Renggan.

“Kati nuan tu ke nubai ikan, kami?”

“Au, aku mih tu,” saut apai tuai orang nya.

Bedau abis Ngelai nanya apai tuai orang nya, enda mukai-mukai dia dih indu gamang ke bechura chinang-chinang pansut ari bandir kayu ensurai seberai pendai alai Kumang mandi dia.

Indu gamang nya nyau begelemung terebai pansut ari bandir kayu nya lalu ditangkanka burung tanduk ti nyau bulih mesai tibang nuju bala sida Ngelai ke benung minching ilang enggau terabai.

Nama dianti agi dih, Ngelai enggau bala bujang berani ke bukai nyau nyepar belanda ngelarika diri.

Bisi sekeda nyau abis tesangkut sereta labuh ninggang pangan diri lebuh sida ti beguai deka ngelarika diri nya.

“Apuu! Nama kebuah bala bujang berani kitai baka nya, nyau abis besepar ngelarika diri?” ku siku indu enggau anak mit ke bisi dia pengudah meda bala lelaki ti nyau ngelarika diri empu.

Sida balat tekenyit enggau enda nyangka tau meda gamang enggau burung tanduk datai nuju bala sida bebala mayuh dia.

“Dini endur Aya Galayan Pelelang Dan Rapuh Patah, Sigi Kering Baka Payan Kah?” ku bala bukai ke bisi dia nanya.

“Nama kebuah nuan Ngelai ngiring enggau chara ti enda menuku?” pia ku bala sida ke indu mantah Ngelai.

“Nadai utai ulih digaga kitai dikena nyeliahka utai baka nya.

“Indah ipar Gelayan enda mih ulih ngereja utai baka nya. Nya alai, kami sigi patut lari,” ku saut Ngelai.

Benung sida ke begau, dia Kumang enggau menyadi indu iya, Lulong lalu mupuk nurun ngabas lubuk endur Kumang mandi nya.

Datai seduai dia, seduai meda ikan ti dikerindu ke seduai iya nyau melepung, semua parai magang.

Seduai balat sinu enggau sesabak meda ikan dikesayau ke seduai nya abis parai.

Maya ke nyabak nya, jari seduai enda ngetu milih sereta ngumpul sekeda ikan ke dikesayau ke seduai lalu dibai pulai ke rumah.

Pulai mih Kumang enggau Lulong ngagai rumah panjai sida enggau sabak-sabak. Ati seduai balat sinu meda ikan dikesayau ke seduai nyau abis pmati.

Kumang enggau Lulong balat tusah ati lalu tekala nya ngulit ke ikan ti dikesayau ke seduai.

Seduai semina ngena gari luya aja lalu mekulka diri dalam bilik nadai pansut.

“Nama kebuah bala bujang berani kitai di Gelong tu bangat tusah enda tebunuh ke apai tuai orang nya?

“Enti aku tu lelaki, udah mih apai tuai orang nya tadi tang nadai guna aku bejaku laban aku semina indu aja,” ku Kumang ngeransi.

Ninga Kumang bejaku munyi nya, Ngelai pansut nganchau tikai ba ruai iya lalu bejalai sepanjai rumah panjai betesau madah ke bisi aum deka diaduka iya.