KUCHING: Sekretari Politik Kepala Menteri Sarawak ke mega Ex-Adun Jemoreng niang Abu Seman Jahwie udah nadai Pukul 6.00 pagi tadi ba Rajang Medical Specialist, Sibu.
Pemidang niang ninggalka siku balu, tiga anak enggau dua iku uchu.
Niang Abu Seman beumur 64 taun kala pengari rayat ba Dun Jemoreng pengelama dua penggal ari 2006 nyentuk 2016.
Berebak enggau nya, Menteri Muda Pekara Korporat enggau Ukas, Abdullah Saidol ngarika raban kereja Ukas, ngenataika penyinu ati ngagai sida niang sebilik.
“Aku deka ngenataika penyinu ati ngagai sida niang sebilik. Niang baka menyadi diri sereta bakih ke chukup imun ngereja pengawa, nyamai enggau begulai sereta dikerinduka mensia mayuh.
“Laban ke kala nyadi pengari rayat ba Dun Jemoreng tentu jasa enggau pemanah pengawa iya deka seruran dikenang.
“Arapka sida sebilik kering ati napi penguji nyerumba Hari Lima ke chukup besai reti. Arapka semengat niang begulai enggau Petara ba serega,” ku iya ba penerang berita Ukas.
