Ex-Sekretari Besai FAS dilepas nengah jamin RM8,000

KUCHING: Ex-Sekretari Besai Gerempung Main Bol Sarawak (FAS) dilepas nengah dua iku penjamin ti mayar RM8,000 pengudah iya ngaku enda salah bekaul enggau tiga kes dawa salah guna duit ke mungkur pengerugi urung RM191, 298.70 ditapi gerempung main bol nya, kemari.

Akim Kort Seksyen Dayang Ellyn Narisa Abang Ahmad ngemendarka Ismail @ Razali Dollah, 49, ari Taman Melati Samariang dilepas nengah ikat jamin sementara nganti kes dibechara baru kena 14 Ogos ti deka datai.

Razali mega dipinta ngeripot diri ngagai Balai Polis Gita ninting dua minggu sekali nyentuk kes nya apus.

Iya napi tiga kes dawa bepelasarka Seksyen 408 Kanun Keseksaan ke ngundan ukum jil minima setaun enggau enda ngelui 14 taun sereta lunsin enggau ukum duit genap siti-siti penyalah.

Ungkup dawa keterubah, Razali ngena kuasa iya dalam FAS ngereja pengawa salah guna belanja penyampau RM139, 920 kena 4 Februari 2017 di Stadium Negeri Sarawak, Jalai Stadium.

DILEPAS ENDA LAMA…Razali (kanan) deka dikanggau bechara baru kena 14 Ogos tu.

Ba tuduh ti kedua, iya didawa ngereja penyalah ke sebaka mungkur wang RM21,378.70 dipenggi FAS kena 13 Februari 2017 ba Lea Sport Centre Wisma Hopoh, Jalai P.Ramlee ditu.

Ungkup tuduh kepenudi iya nya didawa ngereja pengawa salagh guna belanja mungkur wang FAS penyampau RM30,000 di Stadium Nengeri kena 18 Januari 2017.

Dulu ari nya, sapit pendawa raya Ruthra Raj minta kort ngelepaska Razali enggau jamin RM10,000 tunai taja pia luyar ti ngarika iya Dominique Ng minta awak jamin nya dikurangka mit agi.

Ng madah Razali siku ari kaban senior gerempung ke patut dipebasa,” k N

“Kami deka bejalaika atur ngemansutka saman ngagai orang ke bisi kaul enggau tiga kes dawa tu,” ku iya.