SEPANG: Formula One (F1) ulih nentuka Litar Antarabansa Sepang (SIC) nyadi venue tetap dalam kalinda lumba pengudah perintah belabuh berati ke peluang ngatur baru Grand Prix Malaysia.
Menteri Besai, Datuk Seri Anwar Ibrahim madahka pekara nya dikerandau lebuh betemu enggau Presiden ti mega Tuai Pegawai Eksekutif Formula 1, Stefano Domenicali sebedau lumba Formula 1 Gulf Air Bahrain Grand Prix in Malaysia 2026 belabuh diatur di SIC.
“Kami berandau deka mulaika Grand Prix Malaysia ba kalinda F1 chara tetap seraya ngamat juluk peminat ti lama nganti pemulai nya ke Sepang.
“Tang, pengawa nya begunaka awak laban nusun kalinda lumba meseti ngira taga sereta kunterik enggau menua pengatur diatu,” terang iya ba Facebook.
Anwar madahka pekara nya deka dibai ba randau begulai enggau Raban Menteri ngambi berati ke peluang enggau tunga kuing, nyengkaum penau menua sereta pengulih pemaik ekonomi ngagai rayat.
“Insya-Allah, perkara tu deka dikerandau begulai enggau Raban Menteri lalu ngira penau sereta pemaik ngagai ekonomi enggau rayat,” ku iya.
Sepang ngatur baru lumba F1 ba taun 2026 pengudah kepenudi nyadi tuai rumah Grand Prix Malaysia ba taun 2017.
Taja pia, pemulai sekali tu nyadi Grand Prix Malaysia, tang SIC nyadi venue sementara ungkup Formula 1 Gulf Air Bahrain Grand Prix in Malaysia ari 2 nyentuk 4 Oktober tu tadi.
F1 enggau Serakup Besai Automobil Antarabansa (FIA) sebedau tu ngenuku pengawa mindah lumba Bahrain ke Malaysia diatur pengudah dipesetuju Formula 1, FIA sereta kerajaan Bahrain enggau Malaysia nentuka lumba nya ulih diatur ba kalinda 2026.
Anwar meri terima kasih ngagai Bahrian laban pechaya enggau milih Malaysia sereta SIC ngemujur lumba nya.
“Aku meri terima kasih ngagai Bahrain laban pechaya ke Malaysia enggau SIC ngemujur Formula 1 Gulf Air Bahrain Grand Prix 2026 sambil ngedut kaul bebakih kededua menua,” ku iya.
Ku iya, kerejasama rat entara SIC enggau Bahrain International Circuit (BIC), kelimpah pengeransing semua tim pengatur, nentuka lumba nya mujur diatur. – YUZAIRUL YUSOF
