SRI AMAN: Perintah Sarawak deka terus ngeruri fasiliti lumba ba selampur nengeri nentuka fasiliti ti digaga enggau enda diteju, ku Premier Sarawak, Datuk Patinggi Tan Sri Abang Johari Tun Openg.
Ku iya, genap stadium ti diseruri tauka digaga baru meseti dibuka ngagai sekula besemak ngambi fasiliti nya dikena belama.
“Nadai guna kitai ngaga stadium tang enda dikena nyentuk babas diteju nyau panjai.
“Lebuh kitai ngaga stadium, tumbuh mega ngagai sekula lalu ngemendar sida ngena nya.
“Anang netapka bayar suwa ti kelalu tinggi.
Perintah Sarawak udah ngagihka belanja, kena manah stadium enggau padang lumba ti dikemisi kitai,” ku iya.
Abang Johari madah munyi nya lebuh bejadi Pengawa Nangguh Lumba Sarawak (SUKSAR) di Kompleks Betutup Sri Aman ditu, kemari.
Iya mega madah, Perintah Sarawak enda kakang ati meranak puku nyendia fasiliti ke pemaik rebak dudi tang nyemetak madah ke fasiliti nya meseti dikena manah.
“Utai ti dipinta aku semina deka ke fasiliti tu dikena enggau manah,” ku iya.
Iya mega madah, inisiatif baru deka dikena dalam perambu kuarters perintah enggau ngaga rumah pegawai perintah semak agi enggau padang lumba enggau palan rekreasyen.
“Ngena chara tu, pegawai ulih belanda ngena fasiliti ti disedia enggau nyaga pengerai sida,” ku iya.
Ngenang pemansang lumba ba renggat serantau, Abang Johari madah ke Sarawak sedia nyadi pemelanja begulai Lumba SEA begulai enggau Perintah Besai taja ungkus ngatur nya besai dikena ngangkatka standard lumba ba nengeri tu.
“Lebuh Menteri Besai, Datuk Seri Anwar Ibrahim nanya sekali ke Sarawak ulih nyadi pemelanja begulai Lumba SEA, aku madah ke ungkup Sarawak enggau Malaysia, kitai sedia melanja.
“Kitai sanggup bekunsi belanja bai pengeran kitai deka nambah standard lumba anak Sarawak.
“Abis nadai sida ulih meda tikas ti diguna lalu ari nya standard lumba kitai deka terus mansang,” ku iya.
Iya mega madah, pengawa ngatur tauka sukung ngagai lumba betikas besai begunaka pengawa nyeruri stadium sereta venue pekit dikena nangkup standard antarabansa. – SITI NURAIN RATANI
