KUCHING: Tiga buah feri ti dikena neresa sungai Batang Lupar udah tu ila semina nyadi kenang enti pengawa ngaga jematan nya tembu dalam timpuh 48 bulan, ku Tan Sri James Jemut Masing.
Sapit Kepala Menteri ti mega Menteri Infrastruktur enggau Pemansang Penyangkai Kapal nya madahka, trajedi ngenyinu ati ke kala nyadi Feri Triso ti nabanka semilan nyawa rayat Sarawak pun taun tu tadi sigi nadai agi nyadi.
Ku Masing, Jematan Batang Lupar deka nyadi sebagi ari semilan buah jematan besai di nengeri tu ke deka digaga enggau ungkus urung RM2 billion.
“Jematan tu semaya ari Perintah Besai lebuh menua dipegai Barisan Nasional ti deka digaga nitihka kerejasama penyampau 50 peratus.
“Taja pia, udah perintah Pakatan Harapan (PH) mega menua kena 2018, semaya 50 peratus ngaga jematan tu ditarit pulai,” ku iya dalam siti penerang, kemari.
Berindik ari nya iya madahka, Perintah Sarawak ba baruh Gempung Parti Sarawak (GPS) melanja semua ungkus ngaga jematan nya penyampau RM848 juta ngambika enda ngasaka ati rayat Sarawak.
Program ngelancharka projek jematan pemanjai 5.1 kilometer tu deka dipenyadika Kepala Menteri Datuk Patinggi Abang Johari Tun Openg kena 23 March di Pulau Triso.
Ku iya, lebuh jematan nya udah tembu ila, pejalai ari Kuching ke Miri semina 900 kilometer sereta lebih lanchar.
“Ukai nya aja, jam pejalai entara dua buah mengeri tu mega deka lebih pandak,” ku iya.
Masing nandu, timpuh ngaga jematan tu dipelabaka ngambi awak 48 bulan.
“Pengawa tu sebagi ari visyen GPS dalam nyendiaka perengkaguna pemun di Sarawak baikka dibantu tauka enda dibantu ari Putrajaya.
“Tu meh semaya kami ti deka dikeamat ngagai rayat,” ku iya.
