KUCHING: Perintah Besai meseti nungkap baru formula tauka penteba ti endang udah bisi ba pengawa ngagihka bajet.
ADUN Marudi, Datuk Dr Penguang Manggil madah, formula ti endang udah bisi nya udah enda engkeman agi dikena sereta patut ditungkap.
Ku iya, pekara nya beguna amat ngambi Perintah Besai ulih ngagihka bajet ti adil enggau sebela baka dalam Sempekat Malaysia 1963 (MA63).
“Genap kali pengawa mantaika bajet, Sarawak semampai nerima agih belanja ti mimit ari Perintah Besai.
“Ba Bajet 2024 ti dibantai kemari, Sarawak diberi agih belanja RM5.8 bilion aja iya nya semina nambah RM200 juta aja enti dibanding Bajet 2023 lalu Sabah bulih agih belanja RM6.6 bilion.
“Pekara tu enda nipakka asil ti diulih Perintah Besai ari kededua nengeri tu kelebih agi Sarawak,” ku iya.
Nya alai, ku iya, beguna amat Perintah Besai nungkap baru formula ba pengawa ngagihka bajet ti adil enggau sebela sereta bepelasar ke MA63 dikena mandangka semangat Malaysia ti bendar.
Terang iya, Malaysia ditumbuh lebuh tiga wilayah iya nya Tanah Melayu (Semenanjung Malaysia), Sabah enggau Sarawak setuju begulai numbuhka menua tu.
“Nya alai, Perintah Besai meseti nungkap baru formula nya bepelasar ke MA63,” tandu iya.
