KUCHING: Skim Pelajar Tinggi Pechuma Sarawak (FTES) siti polisi strategik Perintah Sarawak dikena negap ekosistem pelajar tinggi ti diempu nengeri tu lalu ukai dilanggur dikena meri subsidi ngagai semua institusyen pelajar tinggi.
Kaban Parlimen Puncak Borneo, Datuk Willie Mongin madah, nya siti pengawa meranak puku ba institusyen pelajar tinggi ungkup pemansang timpuh panjai nengeri tu.
Iya madah, sukung ngagai Universiti Swinburne, Universiti Curtin, Universiti Teknologi Sarawak (UTS) enggau Kolej Universiti i-CAT (i-CATS) ukai pengawa bechiping tang dikena nempa pengulih nengeri.
“Universiti perintah baka Universiti Malaysia Sarawak (UNIMAS), Universiti Teknologi MARA (UiTM), Universiti Malaya (UM), Universiti Sains Malaysia (USM) enggau Universiti Kebangsaan Malaysia (UKM) endang nengah kuasa Perintah Besai ti meri subsidi besai (90 peratus) ngagai bayar ba institusyen nya ngena turu nasional.
“Nya alai, pengawa minta Perintah Sarawak nanggung teda ungkus nya mai reti perintah nengeri mayar dua kali lipat, tu chukup enda engkeman ari sukut fiskal enggau enda seriris enggau konstitusyen,” ku iya.
Willie bejaku munyi nya dikena mejah penemu Kaban Parlimen Stampin, Chong Chieng Jen ti nyemela konsep sebela (equity) enggau seriris (uniformity) sereta melakangka pugu konstitusyen, pekara wang enggau polisi FTES.
Tampung iya, nyema Chong madah ke bantu tambah diguna ba pekara nya, bantu nya patut datai ari Perintah Besai lalu ukai ngelempaika tanggungpengawa nya ngagai perintah nengeri.
“Semina ngarap pemayar chukai Sarawak nanggung setengah tauka lebih ungkus pelajar peribit enggau menua luar nya enda relevan ari sukut pekara wang sereta enda asi ngagai ruang bilik ti ngembuan penatai pemisi baruh lebuh anak sida belajar ba institusyen diempu perintah nengeri.
“Dawa ti madah ke tebal agi nembiak Sarawak dikelaung mega nutup pengamat Sarawak nyendia bemacham bantu pelajar ti bukai nyengkaum bantu beselinting, sekularship enggau skim sukung khas ungkup raban B40 kelimpah ari FTES. “FTES semina siti komponen lalu ukai langkar kereja sukung penuh pelajar Sarawak,” ku iya.
Tampung iya baru, sulu jaku ‘nadai rayat Sarawak patut tinggal’ meseti dipereti enggau manah bepelasarka polisi enggau pengamat pekara wang lalu ukai retorik politik aja.
Terang iya, bungkur semua ukai mai reti semua servis patut sebela lalu nadai ngira bidang kuasa, struktur ungkus enggau atur tanggungpengawa.
“Perintah Gempung Parti Sarawak (GPS) patut diaku enggau dikemegah laban berani nyingkang ke mua nyendia pelajar tinggi pechuma ba institusyen diempu Perintah Sarawak taja pelajar nya tanggungpengawa Perintah Besai,” ku iya.
