OYA: Pedagang indu menua tu dilalau ngerejister enggau ngaga dulu lisin dagang sida.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Seri Fatimah Abdullah madah, sida deka muntang agi bulih mayuh macham bantu ari opis enggau ejensi perintah enti bisi lisin.

Ku iya, rugi endar enti sema sida tu enda bulih bantu ari opis enggau ejensi semina ketegal nadai lisin aja.

“Sida ke nadai lisin tu mega enda bulih bantu belanja nyengkaum bantu diberi sekumbang pandemik Covid-19 laban nadai ngembuan rikod ti diguna.

“Nya alai, kita ke bedagang anang sanggu minta lisin,” ku iya rambau Program Nemuai Ke Kampung Senau Begulai Enggau Raban Indu, Nembiak, Apai enggau Nembiak PBB Kampung Senau ba Balai Raya Kampung Senau, Oya apin lama ke udah.

Fatimah madah, bisi sekeda piak madahka diri enggai minta lisin laban nangika Opis Pengumpul Pupu Dalam Menua (LHDN) minta bayar chukai.

“Ukai sepeneka LHDN minta bayar chukai laban pekara nya bepanggai ba penyampau asil diulih sida,” ku iya. – UKAS