BANGKOK: Dua iku gajah beumur entara 20 enggau 35 taun ditemu parai ketegal kena tangkap pagar karan diengkah pengempu kebun rian semak Taman Negara Tai Rom Yen di wilayah Surat Thani, Thailand.
Nitihka penerang, penusah nya nyadi kena 12 Oktober tu tadi lebuh jelu nya ditemu udah parai pukul 11 pagi.
Raban lutur udah nuju endur nya pengudah nerima kangau telefon udah tetemuka dua iku gajah tegali semak jalai.Gajah nya dipelaba berat 3.5 tan enggau 2.5 tan.
Berindik ari nya, siku lelaki beumur 43 taun benama Jaroon ti diau ba sebuah rumah enggau enda jauh ari endur nya udah ditan.
Ku Jaroon ke mega pengempu kebun rian nya, iya udah ngaga pakar karan dikena nyaga kebun iya ari kena rusak jelu siga.
Ku iya, urung pukul 6 lemai 11 Oktober tu tadi, iya masang pagar karan lalu berapa jam udah nya, iya bisi ninga nyawa gajah.
Tang pukul 6 pagi siti, iya tetemuka dua iku gajah tegali enggau udah parai.
