KUCHING: Sehari tu hari kepenudi alai kitai Dayak nyikap diri bebelika barang dikena ngintu Gawai Dayak taun tu.
Ari tinjau Suara Sarawak ba palan bebeli barang ditu kemari agi tubah kitai bansa Dayak bededat bebelika barang nyengkaum gari dikena berami.
Ku Letu Arit, 49 taun, bisi lapan anak, iya semina meli barang ti patut aja dikena ngintu Gawai.
“Kami menyanak deka ngintu Gawai ba Serian taun tu.
“Barang dibeli nadai entu mayuh, semina meli barang ti patut aja kena ngintu pengerami.
“Gawai taun tu kami nadai entu rami laban menyadi mayuh nadai pulai, taun baru, 2020, baru kami rami laban menyadi aku udah besemaya deka pulai,” ku iya seraya ngelalau mensia mayuh nagang diri ngirup ai bisa maya berami.
Bebida enggau penemu Elin Uja, 27 taun, madahka diri gagit pulai ke menua laban sida serumah deka rami ba rumah panjai baru.
“Gawai tu kami mangkung tiang ngerami rumah panjai baru ba Kampung Tegelam, Simunjan.
“Lama aku udah nyikap diri begagaka kuih, meli ai enggau meli pemakai, tang sehari tu aku ngemai indai meli gari dikena rami.
“Taja mayuh barang dibeli tang aku tetap ngagih belanja dulu ngambi enda tebasau laban ngadang besai belanja ngintu pengerami.
“Nya kebuah aku dulu nyimpan duit, ngelimat belanja,” ku iya seraya nambah, menua sida agi nengah jalai ai, agi merau mudik ke rumah panjai.
Seraya Ezekiel Wesley, tujuh taun madahka diri gagit deka mandi sungai maya pulai ke menua.
“Aku rindu amat maya pulai ke menua ngintu Gawai laban ulih mandi sungai.
“Tambah mega aku ulih betemu enggau ini aku ba Padawan din.
“Ini mega tentu udah ngaga kuih Gawai laban ninting taun iya endang ngaga kuih,” ku Ezekiel gaga.
Ku Ezekiel, taja rindu mandi ba sungai iya enda berani mandi kediri laban enda teleba enti nadai apai indai nyaga.
Nangkan nya, Dorathy Sangan, 24 taun, enggau Juleyaty Endun Impin, 21 taun, berasai gagit deka betemu mua enggau apai indai di menua.
“Kami duai nadai entu bebelika barang laban pulai ke menua deka betemu mua enggau apai indai, lelenggau amat asai.
“Baka belanja dikena rami kami mayuh agi meli barang pemakai dibanding enggau gari laban berundingka pemayuh pengabang datai ke rumah maya Gawai Dayak.
“Taja sida di menua udah begagaka kuih tang kami duai meli dikena nambah,” ku Dorathy enggau Juleyaty.
Dorathy mega ngarapka mensia mayuh anang rua belanja maya ngintu Gawai Dayak sereta anang kering jaku lebuh begulai enggau pangan diri enti udah mabuk.
“Enti udah mabuk, kitai patut tinduk, anang mantaika pengering sereta anang tinggi jaku.
“Begulai manah maya rami tu laban tu awak kitai begempuru, betemu sereta begulai. Ukai suah, setaun semina sekali aja,” ku iya madah nyemetak.
