Gawai di Rumah Linggie dirami ngena macham main

BINTULU: Gawai Dayak tu sebagi ari hari besai ti diintu raban bansa Dayak kelebih agi bansa Iban, Bidayuh enggau Orang Ulu di Sarawak ninting taun kena 1 Jun.

Baka raban bansa Dayak bukai, peranak Rumah Linggie di Nanga Sikit, Ulu Kakus, Tatau mega gagit mulaika diri ke menua ngerami Gawai Dayak ke alai sida kemisi lalu pulai ke menua tumu berengkah ari 28 ngagai 30 Mei.

Kenu ku Penyanding Penemu Rumah Linggie, Sang Sanjan, 40 taun, baka selama kena lemai 30 Mei sida serumah dulu baum lalu berandauka atur pengerami dikena ngintu Gawai.

“Tembu baum, bala komiti ti dipadu gawa berengkah niri enggau ngelagu panggau ti dikumbai Panggau Gawai Rumah Linggie sereta berambaika jaku Begulai Sejalai Ba Rumah Panjai.

“Sekeda komiti mega dipadu nungkus perais, ngerintai atur pekit enggau pekit tauka lumba rama dikena bebuti enggau berami kelimpah ulih nyintal kaul teguh agi,” ku Sang ngelansa.

NALI ADAT LAMA… Peranak Rumah Linggie meruan ngetanka adat lama, miring dikena minta berekat ari Petara.

Kelimpah ari nya, taun tu sida serumah chukup benasit laban projek Sistem Solar ti meri bekal kuasa karan 24 jam mujur tembu digaga sebedau Gawai nyadi.

Projek tu datai ari Perintah Sarawak nengah Opis Menteri Utiliti enggau Sarawak Energy ti dipejalai di baruh Skim Bekal Kuasa Karan Alternatif Menua Pesisir (Sares), ku Sang nerang silik.

“Tumu pagi 31 Mei, kami serumah sampal nurun ngagai taba Stesyen Sistem Solar besemak enggau rumah panjai ngemujurka pengawa bejadi sereta makai selamat nengah adat lama, miring sereta genselan ngena darah jani.

“Pengawa tu dientudi enggau sembiang merekat bilik ngagai sida ti udah megai pengarap Kristian sereta miring ba bilik sida ti meruan ngetanka pengarap lama,” lansa iya.

Pengudah bala terenah ngintu diri lemai 31 Mei, kami serumah ngepunka Gawai enggau Pekit Karaoke ungkup lelaki enggau indu sereta Pekit Pundan, lelaki ngelakun diri nyadi indu.

SAMPI MINTA BEREKAT… Sang miau sida ti mangku piring ngena manuk ngambika gerah agi bulih rejeki, gerai nyamai sereta chelap lindap nguan menua.

“Awak tu mega dikena kami serumah beperindang sereta ngaul bala nembiak nelebaka diri begulai enggau sida ti tuai seraya ngerindang diri nganti nyeradak ai pengayu genap pukul 12 tengah malam.”

Muak pagi 1 Jun, bala komiti gawai kiruh ngatur Pekit Makai Ruti, Pekit Makai Mi enggau Pekit Ngajat Indu enggau Lelaki ungkup nembiak mit.

“Kategori orang besai tuai mega bisi diatur baka Pekit Makai Mi Ramen, Pekit Nyipak Tin ungkup lelaki enggau indu, Pekit Batak Tali enggau Pekit Masing Ai ngena butul puang.

“Gawai richah agi muakka malam enggau mayuh macham atur pekit nyengkaum Pekit Nganyam Ketupat, Pekit Ngirup Tuak ungkup lelaki enggau indu, Pekit Ibu Bajik Tuai sereta Pekit Ngajat Nembiak Mit Indu enggau Lelaki,” ku Sang ngerintai atur pengerami sida serumah.

Pengawa nyuaka perais ngagai bala pemenang mega diatur malam 1 Jun ngena macham bungah enggau gagai ari sida ti landik ngelagu utai, ngasuh ati lantang.

REGAS… Bala pemenang ba genap kategori dipekit bela nerima perais ari bala komiti Gawai.

“Kami serumah mega bisi ngabang beraban ari bilik ke bilik kelebih agi ngabang tuak gawai seraya mandangka basa ngagai orang ti ngempu bilik laban tu awak endur kitai ngabas enggau nanyaka rita sida.”

Ku Sang, Gawai Dayak taun tu nyadika pengingat sereta kenang manis sida serumah lalu iya meransang semua sida anang enda mulaika diri ke menua, abis nadai setaun sekali.

BISA… Pekit Ngirup Ai Tuak nyadi sebagi ari pekit dikena ngerami Gawai.

 

KERING… Sekeda ari penyereta Pekit Batak Tali.

 

NGABANG… Pagi 1 Jun sida serumah ngabang beraban ari bilik ke bilik ngapuska rumah.

 

UTI GAWAI… Sebagi ari pekit ti bisi diatur, masing ai ngena butul puang, ngerichahka agi Gawai sida serumah.