Gawai Mangkung Tiang

Tu sebengkah ari gawai ke agi diintu sekalika nya ba rumah panjai tauka mengeri

“Enti Gawai Mangkung Tiang udah didiri, rumah panjai nya dikira udah tuai lalu nadai penti pemali agi endur nirika gawai bukai.”

Bansa asal nguan pulau Borneo kelebih agi bansa Iban ngintu mayuh macham gawai nitihka tuju gawai nya diintu.
Ku tampung penemu ari Tuai Rumah Akul Dagang ari Sungai Belalang, Salim Sibu, sebengkah ari gawai ke agi diintu kitai bansa nadai ngira ba rumah panjai tauka mengeri iya nya Gawai Mangkung Tiang.

Gawai tu deka lalu patut diintu dulu agi ba rumah panjai ke baru udah tembu sereta diwan, sebedau peranak rumah panjai nya tau nirika gawai bukai.

“Enti Gawai Mangkung Tiang udah didiri, rumah panjai nya dikira udah tuai lalu nadai penti pemali agi endur nirika gawai bukai.

PEMALI: Batu, ruas asi pulut enggau ai enda tau nadai lebuh ngintu Gawai Mangkung Tiang.

“Reti iya, semua bagi pengawa ti ditaga dikereja ba rumah panjai tu tau diatur enggau dipujur magang nitihka adat lama ti nadai pulaika penanggul agi,” ku iya ngelansa.

Kenu ku iya, Gawai Mangkung Tiang diintu enti bisi rumah panjai direrak lalu mungkal berumah baru ketegal angkat mindah ngiga menua baru ninggalka temawai tauka enti bisi penusah ngenyit baka angus, ditabanka tanah tusur tauka ketegal rumah udah kelalu lama sereta repuk.

“Baka kami serumah ke ngentak rumah panjai baru pengudah pambar lalu mayuh bala berumah nyembuah, nampung rumah panjai bukai tauka mindah ke mengeri.

“Kami dulu ngampun sebedau ngererak rumah, udah nya nirika dampa lalu diau dia lebih ari 10 taun endur rumah panjai baru tembu,” ku iya nikalka kenang.

Ngenang Gawai Mangkung Tiang tu ku iya, endang diintu nitihka ripih gawai lalu bisi mega merambu hari nyadi nitihka kenyap tauka munyi burung.

PIRING BILIK: Genap pintu deka miringka tiang pemun dalam bilik.

“Sida ti ngintu gawai tu endang orang ti bepenemu sentang adat enggau atur ngintu gawai tu.

“Sida tu dikumbai lemambang lalu bisi penemu nentuka ripih enggau tusun gawai ti genap sereta silik dikereja ngambika nadai penimpang enggau pengurang.

“Enti sema rumah panjai nya nadai lemambang, sida tau ngambi ari menua bukai ngambi ngemujurka pengawa sida serumah.

“Lalu penatai lemambang ti diambi deka diambat bala nembiak ngena gendang, ngena piring, ngena ading ngelawa tiang pengingat.

“Udah nya sida lalu bedara sereta mengap ba tiang pengingat rumah panjai nya,” ku iya ngeripih.

KENANG BESAI: Tuai Rumah Akul Dagang begambar ungkup kenang enggau Sempurai Petrus Ngelai lebuh nirika Gawai Sandau Hari.

Nangkan nya ku iya, pedara sida lemambang tu dikena nawar salah kenyap, salah pengangkat, salah mimpi, salah hari enggau nyangka bisi salah burung enggau salah tenung.

Pedara tu dibagi ngambika burung jai ditinggal di tanah lalu burung tuah ti manah dibai niki ke rumah, ku iya.

Udah nya ku iya, bala lemambang lalu angkat mengap tama ke rumah panjai, ari tiang pengingat napatka kaki tangga, niki ke tanju lalu niti ruai sekali besundang sebedau sida nudukka diri ngimbai pandung besai ti didirika ba tengah ruai tuai rumah.

“Sida lalu miringka pandung. Kelimpah ari pandang ba tengah ruai tuai rumah, genap pintu bilik rumah panjai mega bisi nirika pandung mit ba tengah ruai diri empu.

“Penembu bala lemambang nyendiaka piring pandung, sida lalu ditiki begulai enggau bala pengabang.

NGELALUKA PETARA: Piring mega bisi disedia ba ruai genap pintu bilik

“Pengudah ditiki, maya hari salah kelala, nya maya sida ngetu nganti ripih pengawa sebengkah agi lebuh mengap baru sepemanjai malam.

“Apin bala lemambang nampung pengap ke ujung agi, seraban orang ari rumah panjai nya empu dulu begendang lalu berayah ngerandang jalai.

“Kereban dikena lemambang maya mangkung tiang nyengkaum batang kayu lemuni, randau malam enggau ruas asi pulut. Sebedau ngerak tiang, piring disedia ba kelingkang tauka pingai seputih.

“Ai mega bisi disedia dikena meri tiang nya mandi. Utai dikena berunsut baka batu enggau pau, minyak angi dikena mesi tauka mechik tiang,” ku iya.

Pengudah tiang pemun ba genap pintu dipengap, bala lemambang deka minta bala petara datai ngabang, udah nya baru tiang pemun dipangkung ngena ruas asi pulut ngarika bala petara ti udah dikangau ngena leka pengap, ku iya nampung silik.

Nitihka pengarap lama Iban, sebedau dipangkung, tiang nya endang agi tindu. Nya kebuah iya dipangkung dikena ngerak iya ari tindu ngambika iya dani lalu nerima piring ti udah disedia. Tembu mangku tiang, sida serumah lalu minta enggau besampi ngagai tiang meri penyamai, pengerai, pengaya enggau pengeraja.

“Bala lemambang endang nadai ngetu mengap niti ruai meling pandung sereta leka pengap sida endang ngangauka bala petara datai ngabang lalu nyukung mandung gawai ti didirika sida.

“Maya hari nyau deka kerebak tawas, pengap bala lemambang pan sangkai. Tumu pagi nya bala lemambang belabuh mengap nimang tiang pemun, meri tiang mandi apin ke mangkung tiang ngambika iya dani lalu ulih nyukung ngempung rumah panjai nya.

“Udah kemas bala lemambang tama ngagai genap pintu bilik mangkung tiang pemun, nya baru gawai dikira tembu.

“Abis ripih pengawa, pandung lalu dibuka tauka dirumpang. Bala pengabang mega bela mulaika diri ngagai menua sida empu,” ku iya.

Seruyut jeman moden kemaya hari diserumba enggau gaya rumah panjai dientak malai tanah lalu nadai tiang pengingat, dia sekeda ripih pengawa dipuntang.

“Tu mega ketegal pedis ngiga lemambang sereta mayuh peranak udah megai pengarap Kristen, baka kami serumah.

“Nya kebuah lebuh kami nirika Gawai Mangkung Tiang, pengawa bedara ba ruai enggau genap pintu bilik, disempulang enggau ruas asi pulut, batu enggau minyak wangi kena mesi tiang.

“Taja nadai lemambang diambi mengap sereta nadai nirika pandung baka sida ke tuai menya, tang ripih adat enda tau enda dikereja lebuh gawai tu diintu endang dititih,” ku iya nandu.